Da’s ’n moal wat aans. Op Twente Sport n’n kollum in ’t dialekt. Ze vroagt miej of ik doar elken deensdag wat van terecht kan brengen. In’t plat! As opvolger van Gijs Eijsink dee d’r met oetscheiden is. Now wil ik miej nich geliek rekkenen met Gijs, waant met zo n’n duurgeweenterde schriever as hee, is gin eene te vergelieken. Jammer dat hee ’t nich meer döt. ’t Was meestendtieds geneugelik um te leazen woar as hee ’t noe wier oawer zol hebben. Alzoo ginnen niejen Gijs Eijsink.
Mear as ieleu ‘t ’n peuske met miej wil doon is ’t ja ok good. Waor as ik oawer wil schrieven? Van alns wat. Veur FC Twente heb ik onmeunig völ gegeavens biej mekaar knooit. Van alle wedstrieden, van alle spöllers (ok dee mangs ’n minuut of wat met meugen doon), en nog völle meer. Dat is allemaol biej mekaar knooit duur Bas Vollenbroek oet Olnzel (van Basisweb) in n’n webstea en veur elkeen te zeen op www.fctwentestatistieken.nl . Goat mear ’s kieken. Ku’j oe n’n heeln zet met vermaaken. Ik zal d’r ok wal mangs oawer schrieven, deank ik.
Woarum in ’t dialekt? Now, d’r bint onmeunig völ leu dee heel geern in ’t plat met mekaar wilt kuiern. ’t Is spietig dat d’r völ jonge leu bint dee veend dat, as ze dialekt proat, ze nich vuur goodwies wödt ankekken. Now, van plat proaten is noch gin ene meender wörden. ’t Heurt biej de kultuur van oonze kontreien en boavenal, ‘t Nedersaksisch is officieel anerkant.
En biej de sport wödt d’r ok heel völ plat proat. Doo ik al dee gegeavens biej mekaar gung zeuken oawer FC Twente bin ik alle wedstrieden henlaangs goan met papier en n’n bölken potlood. Of ’t now was in Heldern, Vreezenven, Beckum, Olnzel, Hengel, Hardenbearg of woar dan ok in Twente, langs de lien of in de veurstaandruumte, oaweral köj terecht met dee mooie Twentse spraoke.
Biej alle wedstrieden en treaningspartiejkes heur iej alduur wier de leu kuiern in ’t plat, ok de spoalers en spoalsters. En dan veur ’n wedstried ’n röp van kaptein: ‘Kom op jongs, d’r teagenan, d’r an met ’t spek, Vedaag bint de peunte vuur oons. Hoi, hoi, hoi.’
’t Is Vedaag 4 mei, ’n dag dat wiej alle slachtoffers van de oorlogen gedeankt. Dat möt wiej zo hoaln, alle joaren. En ’n aanderen dag goat wiej (vuurzowiet dat möggelik is in de Coronatied) gedeanken dat wiej vriej bint kommen van ’n oorlog 40-45. Ok anhoalen, toch?
Mear op 4 mei 1986 krig FC Twente ’t an de bokse van FC Den Bosch met 2-1 en op ’n zölfden dag krig Heracles n’n striekert an de ooren van Feyenoord met 4-0.
Ik weunske oeleu n’n mooie wekke too met völ (sport) plezeer.
Martin Peters
