Vergangene deensdagoavond is Björn Kuipers oet Olnzel ’n leidsman biej n’n wedstried in de Champions League tusken Manchester en Paries. En doar wörd achter mekaa twee bespöttelike smiesterige schuppen oetdeelt deur spöllers van Paries dee feiliks n’n heeln donkeren roode kaarte mut opleaveren. Mear Kuipers veend gel meer as genog. Efkes doarna schupt, boeten de lien, d’r wier ene van Paries n’n Engelsman oonwies veur de bene en den pleert gliek met ’n snoeten in de snee. Doar gef Björn wal rood veur.
Iej keunt begriepen dat gin ene doar blie’j met is en d’r n’n bult anmearkingen op komt.
Ok streakvennoot Bas Nijhuis dee, sedert hee ’n poar moal döanig op ’t peerd is zet duur ‘Snor Derksen’, deankt dat hee ok n’n bult möt tooloaten mear hee zit d’r noar mien bedeanken, mangs nog wal ‘s neungst met ziene besloeten oawer ‘schuppe geaven’. En d’r bint ’n köppelke vakbreurs dee d’r ok al met gangs goat. Ik deank dat ze oetkiekt noar ’n scholderklöpken van dee wiesneuze van tillevisie. ’t Möt nich anhaaln….
En dan ha’j vanzölf vergangene zoatermiddag bij den wedstrid tusken FC Twente en Heracles n’n VAR zitten den zik eargens oawer bekummeren waor as hee absloet gin recht too har en dat kösten FC Twente n’n pingel. Den kearl het Marc Nagtegaal. Now, n’n Nagtegaal kan oarig schier fluiten mear ’t lik miej too dat hee dat better tusken de beume in ’t woald kan doon dan op ’t voetbalveald!!
N’n gelle en roode kaarte wörd veur ’t eerste oetdeelt in 1972-1973. Doarveur wörd d’r ok wal straft mear dat wörd daalschreven in ’n beukse van de scheids.
Biej FC Twente krig Kalle Oranen de eerste gelle kaarte op 20 augustus 1972 teagen Haarlem. En ’t eerste moal rood was biej FC Twente in Het Diekman veur Hallvar Thoresen too zee spöln teagen NEC op 29 augustus 1979.
As d’r dizzertieds n’n kaarte wörd geaven krig de klub en de spöller n’n breef in ’t hoes waorin steet dat ze ‘registreert’ bint en hoovöl kaarte ze al hebt en of ze oetslotten bint.
In 1975 wörd Henk Ramselaar van Amersfoort 2,5 joar schorst umdat hee de leidsman n’n trad in zienen boek gef. En Maikel Aerts krig ‘n joar an de bokse in 1997 umdat hee cocaine hef gebroekt. Hans Kraay junior möt in 1983 15 wedstrieden tookieken want hee houwt de leidsman teagen de groond. Rachid Bouaouzan kreeg 10 wedstrieden an de bokse umdat hee met n’n schaandelike oawertreding ’t wiedere voetballeaven van Niels Kokmeijer van Go Ahead noar ’t eand van zien voetballeaven schopt. Henk Vos haalt in 1986 zo oonwies oet noar Hans van Dungen van NAC dat van Dungen ’n nös en de kake brekt. Vos möt 10 wedstrieden brommen. David Loggie krig ok 10 wedstrieden an de bokse umdat hee in de tachtiger joaren op de voes geet met Huub Stevens. En Luis Suárez wöd 7 wedstrieden oetslotten umdat hee Otman Bakkal in zienen nekke bit. ’n Dizzertiedse kieper van Ajax, André Onana, is ok oetslotten. Veur hoolange mut nog oetdoktert wörden. Hee zol iets noar binnen hebben sloekt wat nich dörv.
Ikzölf bin ’n moal 1 joar oetslotten. ‘n Joar laank? Wat ha’j dan in himmelnaam oetvretten? As ik 16 joar bin spöl ik biej EMOS. Ik bin de kaptein en noa n’n wedstried möt ik n’n wedstriedbreef oondertekenen. Achterof blik dat op den breef n’n spöller steet dee nich spöllen dörf. Dat is annegeven deur de teagenpartiej (de Boys oet Eanske) biej ‘n Boond. Ik krieg n’n breef in ’t hoes woarin steet ‘dat ik ’n joar nich mag spöllen vanweagens ’t oondertekenen van ’n nich noar woarheid innevulte wedstriedbreef’. Later – noa wat proaterie op ’t broa van de TVB an de Minister Loudonlaan in Eanske met de ‘baas’ doar, Gerrit Heutink, en oonzen elftal veurman Jan Beune – wödt ’t terugge brach noar 9 moanden. Ik zal oe vertellen dat dat verrekte lang is ai’j geern wilt voetballen. Mear ik heb ’t oawerleaft……
Goodgoan en tot tooken wekke
Martin Peters
