Goanderweg keump d’r wat gangs in de moatregelen dee d’r al zowat aanderhalf joar bint um de Corona ’n kop in te drukken. ’t Get almoal wat bekwemer en soepeler worden. Dat bint vanzölf goode berichte, dat kö’j begriepen.
Zeker geald dat ok veur de sportleefhebbers dee al zo lange wat te missen hebt. Nich alleanig de leu dee zölf an beweagen doot mear ok de leu dee d’r hen goat kieken en eure spöllers wilt anmeudigen. ’t Is mooi dat ‘t wier kan mear d’r mot noch wal acht op worden geaven. Den Corona is noch lang nich vot en wie’j mut oetkieken dat den kraom nich wier ’n kop opstek. Mear loat wie’j blie’j ween dat d’r wier wat reuring koomp.
Heracles Almelo en FC Twente bint drok goande um ‘n anhaank wier noar ’t stadion te kriegen en doot n’n anzet um eure trouwe anhaank vanniejs noar de thoeswedstrieden te kriegen. En doarveur keunt de leefhebbers dan veur ’n heel joar n’n kaart anschaffen. En de zuveren anhaank van de club dee trekt vanniejs de knippe waant den wil nich wat missen in ’t tooken voetbaljoar.
Met van alle aard löstige akties goat z’n anhang bewearken en ’t mut vrömd lopen as ze de teante nich wier vol kriegt.
Loaw d’r van oet goan dat ’t wier oalderwets te keer geet in Erve Asito en De Grolsch Veste.
Mear loat wie’j ok hoppen dat de amateursporters wier drok gangs keunt goan. Dee hebt ’t zekers neudig. En nie’j is dat bie’j ’t voetballen de deerne bie’j de jongs met dörvt doon (is dat ook aansum te doon?). Red d’r oe met allemoal.
Bie’j FC Twente heb ze n’n aktie dee ze neumt: ‘Wie wilt weer noar huus hen’. Dat zol dan Twents mötten ween, mear doar zit ze d’r wal ’n stukse bie’j neungst. ’t Zal d’r nich um misgoan mear ai’j wat doot möj ’t good doon. En ai’j ’t zölf nich juust wet kö’j aait efkes noavroagen bie’j de leu van ’t Twentehoes of de Kreenk veur de Twentse Sproak. Dee bint d’r veur zukswat. En iej sloat genne flater.
Recht-oet was ‘t wes um d’r hen te zetten: ‘Wie’j wilt wier op hoes op an’.
Mear ’t is vanzölf gloepens kaant da’j in Twente veur dizze en ok aandere angeleagenheden oene Moerstaal gebroekt.
En wel wil d’r noe nich: Op hoes op an!
Nog efkes terug noar veurige wekke to den wedstried tuskes Feyenoord en FC Utrecht nich op zaterdagoavend meug wörden spölt vanweagens dat leedkes spul in Ahoy in Rotterdam. Dan mear op ’n zundag doarop, zee de KNVB. D’r stun wat aans in de reglementen en doarum vreug FC Utrecht an de rechtbaank of ze dat efkes recht können zetten en, zooat dat in de beuke steet, op neutraal terrein kon worden spölt. Vanniejs kreeg ze, net as ’n joar veuroet to ze ok tekort wörden doan, gin geliek. Das nich oardig ai’j toesjoer achteroet wödt stelt. En van oewe kollega-klubs niks heurt en niks gin behölp kriegt. Ze loat d’r oe allenig met knooien.
Ik wet noch good dat zoiets ok spöln ’n poar joar terugge, to FC Twente (woar ’n luk was gebuurd, dat nich duur ’n böggel kon) ok van alle kaante as ’n zwarten peter wörden daalzet en ok met de rechtbaanke gangs gung. Ok to gin aandere klubs dee ’n betke metleaven, slimmer noch, d’r waren d’r wat dee leuten wetten dat ze d’r ginnen troan um zollen laoten as FC Twente d’r oet vleug. Mear deur vast te hoalden en ordeantelik te blieven heb ze ‘t doomoals wal veur mekaar kregen.
An FC Utrecht zol ik willen zeggen: Deurgoan, nich opgeven bie’j n’n kommende geleagenheid. Dan kom ie d’r wal wier boavenop.
Mear ie zult ’t aait allenig mutten doon. Oewe vakbreurs en de KNVB hoalt zik almoal an de kookaante!
Martin Peters
