N’n dikke tweentig minuten veur aleer he ’n anlöp veur ’n penaltie geet nemmen löp Herman Smit, antrökken in ziene voetbalkleer met doar oawerhen n’n reagenjas, saam met een van ’n vuurstaand, onröstig oawer ’t veald.
Twee wekke eerder hebt Zuud Esmarke en mien klubke van dootieds (en nog alduur) EMOS oet Eanske n’n wedstried oetvochten veur de kompetitie in de veerde klasse. Op ’t veald van Zuud Esmarke an de Brinkstraot gung ’t d’r döanog van langs. “Ie’j hadden oons n’n penaltie motten doon scheidsrechter” zee ’n veurstand van EMOS achterof. En d’r kwam ’n protest. Doa dörven dat ammoal nog: protest antekenen. Bie’j ’n boond wodden dan getuugen bodden, dee ’n besloet deenen te nemmen oawer ’n toostaand. In de angeleagenheid EMOS wörden ’t protest toowezen. En doarum steet now de sterspöller van EMOS, “Smitje”, vanniejs op ’t veald van Zuud Esmarke um achterof den penaltie te nemmen, dee in de wedstried nich wödden toometten. Twee wekke alzoo noa den wedstried.
’t Is zundag twaalf uur net noamiddag en ik stoa met mien fietske op de weg dee veurbie’j de groond löp woar het zo temet gebuurn geet. Zuud Esmarke vrög n’n geulden a’j d’r kot bie wilt ween mear vanof de stroate ku’j ’t ôk good zeen. Zo hoal ik den geulden in ’n tuk veur wat aans. En ik bin d’r nich
allenig, d’r stoat nog völ meer leu boeten op straot.
Dan keump ‘n keeper van Zuud Esmarke, efkes vuur twaalf uur, ’t veald op met d’r voort achterhen de scheidsrechter. Doar stoat ze alzoo met zien dreeien. Veerteen dage doarveur waren ’t d’r nog 23 dee op ’t veeld heure keunsten leuten zeen. Noadat de scheidsrechter hef oetlegt wat d’r wal en nich mag, wöd den penaltie nömmen deur “Smitje”. As hee ‘m d’r in schöt wint EMOS de wedstried van twee wekke terug dee too met ‘n geliekspel was oflopen en koomt ze boaven an te stoan en dörvt dan meuglik n’n klasse hoger spöllen. ’n Reagenjas geet oet, de scheidsrechter blos op ziene fluit, Smitje nemt n’n anlöp en pleert ’n bal knuppelhard noar de goal hen. Mear hee hef ’n kiekerd nich de goode kaan op stoan en pleurt den bal d’r hoge oawer hen. De leu van Zuud Esmarke joegheint, dee van EMOS loopt met n’n zoeren snoeten noar hoes op an.
Nog ginne twee minuten hef ’t doert mear d’r keump n’n aanderen dag wal ’n vertelsel met ’n portret in ‘n Bants en De Tweantsche Kraant.
Trouwens, bie’j n’n wedstried in 1956 tussen Rapid JC en Sportclub Eanske in Nijmegen woar oet mus worden maakt wel van dee beide an de kampioenswedstrieden met dörven doon, gebuuren zowat ’t zölfde. Doar wörden ôk achterhen ’n protest indeend oawer n’n penaltie dee de scheidsrechter nich geaven had. Maer too wörden den penaltie doadeliks noa ’n wedstried nömmen deur Abe Lenstra en dee scheut den bal d’r wal in. Maer op de kantooren van ’n Boond wörden ’t besloet nommen dat den penaltie nich neudig was en dat ’n scheidsrechter ’t toondertied wa good har doan.
Jammer veur de klub oet Eanske dee twee joar doarnoa ôk in Nijmegen n’n besloetwedstried spöllen. Toe was ’n tegenstaander DOS oet Utrecht. Ôk too bint zee in de deerde verlenging op de koffie kommen waant too scheut Tonny van der Linden van DOS de bal d’r in en was ’t vannie’js n’n treurnis in Eanske. In de gewone spöltied har Gerrit Moddejonge n’n zuuvere goal maakt mear de wörden ofkuurd deur scheidsrechter Leo Horn. As d’r dootieds n’n VAR was wes har Sportclub kampioene wes.
Rechtervoort hebt ze bie’j wedstrieden n’n video scheidsrechter dee achternoa kan oetzeuken of ’t allemoal wal of nich good is goan en dörvt ze doalik ’n toostaand rippereeren. Mear dat geet ok nich aaltied zo as ‘t zol motten ween. Wat zeg ik? D’r wöd heel wat oawer ofdisseld met ongelieke bedeanksels. Benaamd oawer het anraken van ‘n bal met de haande. Doar heb ze van alle amparte bedeanksels oawer. Doar ku’j rap met kloarkommen! Shirtjes andoon zoonder mouwen d’r an vast en gin gat d’r in woar as ie de aarms deurhen keunt stekken! He’j neers gin last van!
Martin Peters
