Veugelkearls en veugelvrouwleu doot an ne aparte sport. Ze kent álle veugel. Loopt ze in ’n bos, dan heurt ze an ’n zaank watvonnen vogel het is. Goodmeudig volk det secuur weet hoe de veugel zich gedreagt. Um ze nit te loaten schrikken dreagt ze camouflage-kleare: een stoffen foekerheudje, mouwloos hesje met grote zäkke en ne bokse van technisch materiaal wat rap dreugnt noa ‘n doonderskoer. Geet ‘r nen vrömden vogel dale, dan steurt ze mekoar nen app. In korten tied steet ‘r dan biej de natte natuurzone an ’n Geskesdiek in Riessen ne koppel volk met vearkiekers en grote gloepkanons op statief.
Vuur zeeldzame veugeln in de eagen umgewing he’w net zo min oge as nen Rotterdammer vuur ‘n Euromast. Zelfs toe’w op ’n Hoolterboar nog strukelden oawer de korhanen. Ik har der nog nooit ene zeen in ’t weeld. Wál in het opgestopte deers-museum van Piet Bos op ’n Hoolterboarg.
Mer met hulpe van nen collega he’k der vuur boeten ene trappeerd. Chris van der Zee, nen collega, har verstaand van veugeln. Later wörden’e domie biej de vluchtelingen; ook mooi woark tusken vrömde veugeln. ’s Moarns heel vroo nöm Chris oons met noar ’n Toeristenweg. In nen specialen bocht ko’j de korhanen in ’t vuurjoar zeen booltern. Het völ miej ’n betn teegn; heel in de vearten zag ik der ene in een beumke zitten. Volgens Chris zuwer nen korhaan. Biej Piet Bos zag iej ze better in de etalage tusken de roggeschoven. En det is ook hét grote probleem: te weanig roggelaand, te völle vöske en klemmerds dee korkukens lust.
De provincie Oaveriessel en Staatbosbeheer doot ‘r wat an. Ze haalt alle joar zon 25 korhanen oet Zweden en dee loat ze lös op ’n Hoolterboarg. Het mag een poar ceant kosten, want ’t korhoen is ‘t symbool van ’n Hoolterboarg/Sallaandse Heuvelrugge. Ze zit zelfs in de zulvern börgemeastersketten van Riessen-Hoolten. Mer plezerige berichten oawer de korhanen bliewt oet.
Kortens köm in Riessen limerick-dichter Jan Zandbergen oet de tied. Jan wes 82 joar en dee tot op gevorderden leaftied an atletiek. In zin leawen dee-r-e metseln, stukadoorn, glaszetten, toneelspöllen, mear ’t leefste hardlopen en limericks dichten; ook oawer de korhanen:
Korhaann
Met de korhaann op ’n Hoolterboarg blif ‘t passen en metn
Ondaanks geboolter bliewtn de geboorteciefers slim bedretn
Zelfs met import-henn en al
Doot dee korhaann gin bal
Zo gangs zit de meeste korhaann in de börgemeastersketn
Gerrit Dannenberg
