Ofgelopen zoaterdagmiddag ha’w een joarlijksen skriewersmiddag van ’n Niejen Bodbreef biej de Rokeriej in Marle. ’n Bodbreef is ‘t kwartaalblad van ’n Kreenk vuur de Twentse Sproak. Good um mekoar één keer in ’t joar te sprekken.
Seends de oprichting van ’n Niejen Bodbreef was Jan Zandbergen oet Riessen der biej. Mer ofgelopen zoaterdag wes een dichter van zowat doezend limericks der vuur ’t eerste neet. ’n Poar wekke terugge was de kearse van Jan op-ebraand. 82 joar; nen mooien leaftied, mer van miej har’e nog wal ’n zetje met-eköand.
Jan Zandbergen schreef zien leaven limericks vuur de kraanten en vuur ‘n Bodbreef. Biej ziene limericks in de kraante zat ook aaltied ne korte zinne, meest met ne taalgrappe um eaven oawer noa te deanken.
Jan wes nen bekeanden Riessender. Aaltied vreandelijk en gloepens bescheaiden oawer zichzelf. Hee har nen hoop taalgeveul. Woonderlijk genog ginnen dichtenden schoolmeaster, mer hee wes metselder, stukadoor en glaszetter. Nét zonne grote leefhebberieje as het dichten, wes het hardlopen. Vroger op gewone schone, later op beste loopschone.
Aaltied wes hee slim zeunig op ’n eaierkörf: nooit roken, gin borrels. “Hool iej neet vol: oawerdag hard woarken en ’s oawends hardlopen,” zea-r’e dan. Aaltied mooi op gewechte. Tot ’t leste too elke wekke twee keer oawer de bane van Atletiekvereniging Riessen of geaiseln duur ‘n bos. Hardlopen gaf um voldoning. Ne keer zea-r-e: “A’k an ’t fietsen zir en ik zee leu langs de weg hardlopen, dan he’k zin um de fietse tegen een boom an te zetten en met te lopen.”
Toe’w in 2010 met nen duurstart van ’n Bodbreef begunnen, wol Jan dreks methelpen. Zo wes’e. Vanof een allereersten schriewersmiddag (biej Jan Haarhoes in Oagel) wes Jan Zandbergen der aaltied biej. Viej jachen umstebuurten met mekoar met. Verleden joar zea-r’e biej ’t oetstappen: “Tookn joar jaag ik.” Det is der neet van ekömmen. Nen hoop zearte, oonderzook, oetslag: asbest-kaanker in beaide longen. ’n Kort recht. Wal zoer; vuural a’j aalt zo gezoond leawd hebt…
Jan Zandbergen: net zo völle dichter as atleet. Nen echten sportman zoonder pretenties. Hee lig begreawen op ’n Leanfert in de Riessense groond woer’e zo völle met op har.
Gerrit Dannenberg
