Corona hef nen hoop vertästoeweerd. Wa-w nooit hardop zeaden krie-w rechtevoort plateain te heuren. Dokters hadden vuur elken klacht ne deuze tabletten en ze schreven z’oe zoonder nöalen vuur. Dree herhalingsrecepten ko-j der zo biej kriegen. Ze goojden met pencilline at wisken. Vuur wiezen road mo-j biej nen homeopaat of Klöasien oet Zalk wean. In ’t zekenhoes monteerden de dokters – ook al zoonder gezoonde preake – vlot nieje onderdelen.
Mer duur corona is ‘t in de zekenhuze zó drok ewörden, det de klaantvreandelijkheaid heel aanders is ewörden. Een poar joar terugge leup slager Arie van Bloomndal zienen hoesdokter, Koos van der Burgh, op de moarkt in Riessen tegen de hoed. “Ik komme vanwekke eawn an,” zeg Arie teegn ’n dokter, “iej munn miej ’n better pufje doon, want ik komme oart loch te kort.” Van der Burgh kon ’t neet loaten en zea: “Begin eens met die peuk weg te doen.” Woerop Arie zea: “Ik vreuge um ’n better pufje en neet um wies bescheed.”
Dee tied is dus vuurbiej. Ineens krie-j van alle kaanten gezoondheaidsadviezen. En doo’j doar niks op oet, dan helpt z’oe neet. Eerst 10 kilo lichter, aanders gin niej knee; oetskeaiden met roken, aans ginne operatie. Alle taboes zeent vot.
Doarumme veen ik de tied riepe um nóg een gloepens geveulig oonderwerp plateain te besprekken. Anleiding is nen foto van Excelsior ’31 oet 1965. Ze wörden toen Nederlaands kampioen. Met serieuze köppe kiekt de hoofdmachtspöllers noar fotograaf Herman Zandvoort. Állemoal Riessenders: Dieks van ’n Zaandkoning, Jan van Jan-Baks, de Zwarte Panter van ’n Leajndekker, Beton van de Tute, beaide breurs van Wold. Ne echte amateurclub. Nota bene: Nederlaands kampioen worden met allene mear Riessender voetballers. Neet met grof geeld betaalde spöllers van boeten-of, mear eagen volk eerst. En doar bedoel ik met: ze magnt alle kluren van de reagenboage hebben, as ze mear oet de eagen gemeenskop komt. Ik veende da-w doar wier op-an mutten. At de boeren terugge mutten noar kleanschaligheaid, dan de amateurvoetbalclubs ook. Grote oondernemmers mangt röstig al heur zwarte geeld in de amateurclub blieven stekken, mear nooit um spöllers an te kopen. Bouwt ne mooie tribune of ne lekkere kantine vuur ne oergezellige doarde helfte. (Zo lange at dat nog mag netuurlijk, want oawer alcohol in sportkantines hebt ze ook al ne hele gezoonde meaning.) Mear wal dreks een verbod um vrömde gooldhaantjes liezem vol te stoppen met vuurdelige regelingen en tooslagen. Terugge noar de echte amateurs. Dan mear een poar joar gin kampioen, mer dan krie-j wal ne amateurclub woer iederene oet de eagen gemeenschap nen earlijken kaans hef.
Watvonnen voetbalclub hef de bälle um dén stap te maken?
Gerrit Dannenberg
