Op TikTok gef et profielen van volwassene kearls. Dee doot hele dage niks anders as proberen um een golfbälleke op allerhande wiezen in nen koffiebeker te loaten stuiteren. Dat kan dan van de trappe of, van de trappe via verskillende pannen. Dat gef dan een mooi ‘pling pleng plang plong plok’. Mangs doot ze et duur ne slange, of met meardere golfbälle tegelieke…
Of ze probeert met nen golfclub nen CD vanof dree meter in nen CD-lader te houwen. Of zittend op nen stool met dee CD-lader vuur zik, den CD achterears tegen de mure achter zik te gooien zodat he terugge stuitert en dan in de CD-lade belandt. Of ze zitt op de banke vuur ne kaste vol beuke, met een book vuur zik. Dat smiett ze zonder te kieken achter zik richting de kaste. Et book skof netjes tusken de rest van de beuke. Iej mut et zeen um et oe good te können vuurstellen.
En et lukket ze ook nog. De ontlading bie dee volwassene kearls is enorm. Juichend springt ze in de bene. Ze köant öare ogene neet geleuven. Wiej ook neet. Ze maakt et zikzelf ook knap lastig, met allerhande hindernissen wat ze
mut zeen te umzeilen. Doar hebt ze mangs wal wekken achter mekoar op eworsteld. Want ook dat loatt ze zeen. En mangs gebuurt der wat onverwachts, bievuurbeeld ene den probeert ne penne van ofstand in ne fleske te smieten en dat den dan precies in eavenwicht op et rändke blif liggen. Beautiful fails neumt ze dat.
Et is dus gin fotoshop of videobewoarking. Ze hebt der wekken op etraind. En dee filmkes wordt miljoenen moalen bekekken. Dat leavert wier geld op, dus feitelik wordt ze beloond um der met verdan te doon. A’j iets mer lange genog herhaalt, wor’j der vanzelf good in.
Wat bezeelt dee kearls, um zik hele dage in allerhande bochten te wringen um zukke onzin oet te voren? En al dee leu dee dat mer harsenloos zitt an te kieken en et doarmet nog stimuleert ook. Goat hen woarken. Goat hele dage achter nen computer zitten en knöpkes indrukken. Doar hef een menske wat an. Loat ze wat nuttigs doon. Of nen echten sport. Darten of zo.
Martin ter Denge
