Sportief gedrag…dat is toch day tegenstaanders mekoar respecteert? Da’j neet on-earlijke met mekoar ummegoat. Dat ‘r gin sproake is van ongelieke middeln um tegen mekoar te keer te goan? Gin meanske zal dit tegensprekken. En zo lange as het geet um leu oonder mekoar, dan hoolde viej oons doar wal zon betje an. Mear as ’t geet um de deers, dan mette viej heel geane met twee moaten. Good begriepen: ik zir ginnen fan van de Partij voor de Dieren en ik mur al helemoals niks hebben van de dierenambulance zo lange as der in Afrika nog leu doodgoat van ’n honger. Wil ik nou neet oawer doon, eerst wil ik ’t hebben oaver een poar dinge dee miej al joaren slim dwars zit.
Deers mu’j natuurlijk nooit ploagen. Nen jager van het goode soort gedreg zich altied weidelijk: deers neet marteln en al wa’j ofscheet good gebroeken. Dat geeldt onverkort ook vuur alle ambachtelijke slagers met leefde vuur ’t vak en respect vuur de deers. Mear a’w het hebt oawer viske, dan wordt het verhaal ineens aanders. Der is ne completen haandel ontstoan roond de sportvisserieje. A’j in nen visweenkel komt, kiek iej oe de ogen oet: hoakenstekkers, loeischoarpe vismesse, verklikdobbers met geluud en lecht, twentig soorten lokvoor, zelfs bootjes um lokvoorbälle nog vearder het water op te brengen… Oawer ongelieke middeln gesprökken, mear ik heur doar nooit ene oaver. Vanzelf hoof dat allemoal neet in enen dag op ’n kop, mear ik wol toch wal heel geane een eande maken aan dit onsportieve gedoo. Een minister mut gewoon verbeden um te visken met wearhöake. Allene nog nen gladden hoaken, zoda’j ginnen hoakenstekker neudig zeent um nen hoaken biej nen vis oet ’n bek te marteln. Dan blif der allene een piercing-geatje oawer en doar kan’k nog wal met leaven; net as de vis.
En a’w dan toch gangs zeent: alle beeste mutten de heurens wier terugge hebben. Ik veende ne koo der slim belachelijk oetzeen zoonder heurens. Goofy-achtige beesteköppe. Onnozele oetdrukkingen met nen doellozen knobbel milden op de harsens. En doar zeg nums wat van. Joa, aans zollen ze mekoar stoten. Precies! Alle krokodillen in Artis de taande der dreks oettrekken: dan biet ze mekoar neet. Beeste zeent kudde-deers en dee goat meestied vreandelijker met mekoar umme as de leu. As ze mekoar stoot, dan he’j der te völle biej mekoar. Zo lösse viej in ene beweaging nóg een groot probleem op.
En dan nog wat: voetballers zollen zoonder noppen oonder de schone mutten voetballen en ’t leewste altied op nat grös. Volgens miej wordt doar ’t veeldgeweeld slim meender van en geet de techniek slim vuuroet.
Woer woche wiej nog op.
Gerrit Dannenberg
