Zelfs Louis van Gaal har ne meaning oawer het functioneren van de regering. Völ miej van um tegen. Biej al dee vrachtwagens vol corona-borrelwiesheaid, ha’k Van Gaal wiezer willen hebben. Mear nee, Rutte en De Jonge deden het heelmoals verkeerd. In Portugal – hee woont doar – hadden ze het völ en völle better edoan.
Hier in Nederlaand he’w een RIVM en ne regering den bekik hoe der vuur alle moatregelen genog support blif en oonderwiel de economie toch gangs köant hoolden. Mer de leu dee vuur oons dizze koare trekt, doot aaltied alns verkeerd. De in-eantingscampagnes doot neet heelmoals wa’w ehopt hadden en dan wordt de commentaren harder, feller en vuural onredelijker. Doarumme har Van Gaal gewoon mutten zeggen: “Corona? Ik heb de haande vol an det gefoebalte.”
Achterof commentaar gewen is heel makkelijk. Eerst schreeuwt de Tweede Kamer um keaihard ingriepen tegen de Bulgaren – wee’j nog – dee ne Nederlaandse oetkering oet de mure trekt met nen seempeln pinpas. Dán klaagt de Kamer det de fraude te hard wordt an-epakt. Belastingfraudeurs mossen van de Kamer streng worden bestreden en dan koomp oetgerekkend Aleid Wolfsen oons vertellen dat potentiële fraudeurs völs te strabaant wordt behaandeld.
Wiesheaid achterof, deskundigheaid met de kennis van nou, klokigheaid van de koolde groond, verstaand oet de draankfleske; vottemet! Want, hoe doo’j dat? Maakt ne woarkgroep van geliekgestemden, zet de harsenkroonkels op mooi glad papier met een deftig logootje, nen glossy umslag, een stuk of wat intellectuele voetnoten en iej hebt een rapport. Kö’j in talkshows nog wekken laank ’n alwiezen broadhaan oethangen. Vuural zeggen hoe ’t neet mut en vuural neet hoe ’t wal mut.
Het is een groot vuurrecht da’w mekoar aaltied de woarheaid recht vuur ’n kop mangt zeggen. Ook polletieke partiejkes dee allene mear schreeuwt oawer een heel smal stukske van de brede problemen van dizzen tied. En desnoods nog hard ropen dat ’t almoal heel aanders har emut, det corona een gewoon griepje is woe’j mangs iets te vlot an doodgoat mear-noh-jea-het-leawen-hef-non-eenmoal-risico’s. Iej mangt van miej ook röstig zeggen dat vaccineren wál mut of juust neet. Dat Jaap van Dissel nen tuinkabouter is of Ab Osterhaus nen oetgerangeerden veedokter. Almoal prima. Mear Van Gaal oawer het coronabeleid…
Ik kenne machtig sympathieke vrachtwagenchauffeurs. Iej maakt ze niks wies oawer vrachtwagens. Mer ik har ze neet geane as minister van verkeer.
Gerrit Dannenberg
