Ik heur Max Verstappen nog neet dreks zeggen: “In 2021 mocht ik het wereldkampioenschap Formule 1 halen in Abu Dhabi.” Of Messi: “Ik mocht in 2021 de beste voetballer zijn.” Mear op LinkedIn is zuk soort week gekuijerte de voertaal ewörden: “mogen” vuur en “mogen” achter. Börgemeasters “mochten uw burgervader zijn in onze mooie gemeente”, wethoolders “mochten het afgelopen jaar mooie dingen bereiken voor onze mooie gemeenschap”. Oondernemmers “mochten producten leveren aan mooie klanten” en ZZP’ers “mochten mooie klussen doen voor bedrijven”. Kearl-an-gen-eande: mag, mogen, mochten…het trekt miej zeute oawer de tonge. De versofting van LinkedIn is compleet.
Was dit zakelijke netwoark eerst vuural bedoeld vuur oondernemmers um mekoar makkelijker te veenden. Doar köm al gaauw de klad in. Dat begun met het vermeelden van allemoal cursussen woe’j nen blauwen moandag an met hadden edoan en een fantasiecertificaat vuur kregen. Ook opleidingen en universiteiten zoonder diploma kon iej der gewoon op zetten. Schrieft ‘r twee joartallen achter en niemand kan zeen da’j nooit eslaagd zeent. Ook al he’j in Rotterdam allene biej de roeivereniging ewes, dan lik ’t op LinkedIn net o’j ne economiestudie an ‘t Erasmus hebt edoan. “Beetje kojt, maaj de stof was mij te theoretisch,” kö’j dan aaltied nog zeggen. Kloar-loeder window-dressing: het hoof neet woar te wean, at mear mooi steet.
Vlak doar achteran köm de nieje lichting jonge oondernemmers dee verestig elken dwarsweend op LinkedIn zet. Doar reageert dan wier aandern op met keenderachtige applausheandkes en stimuleringshartjes. Complete communicatie-ofdelingen zeent de hele wekke drok met mekoar oawer ’n kop strieken en oonder ’n buul. En a’j het woord “mogen” goat törven, dan red iej dat neet met één potlood. In Twente heet dat trefzeker: nederigen hoogmood.
Loa’w earlke wean. A’j as oondernemmer gewoon strak woark ofleavert, tegen ne fesoenlijke pries de’j vuurof dudelijk hebt of-esprökken, dan vaalt ‘r niks te meugen. Dan he’j ’t gewoon leaverd en hoof iej oe neet as nen daankboarn kroephoond te profileren. Broene oarme tot an ’n elleboam zeent de slechtste garaantie vuur tookomstige successen.
Vake is ’t trouwens ook onwetendheaid. Ik heb dit allemoal ezegd in Riessen tegen nen jongen oondernemmer den machtig good woark ofleavert. Hee hef het zeikwoord “mogen” dreks van LinkedIn of-ehaald. Der is nog hoppe vuur 2022.
Gerrit Dannenberg
