Oonze hele maatschappij dreejt um geeld verdenen. Zo völle meugelijk in zo kort meugelijken tied. Gelukkig zeent ‘r nog altied leu dee zich ergens vuur inspant zoonder doar dreks vuur beloond te worden. In de zorginstellingen barst het van de vriejwilligers dee zich belangeloos inzet; oet nöastenleefde of gewoon umdat ze veendt dat zukke dinge mutten geburen. Ook de sportclubs köant neet dreejen zoonder vriejwilligers. Natuurlijk he’j vette sponsoren neudig. A’j alle bedragen biej mekoar optelt dee de oondernemmers in de sport stekt, kom iej an een fantastisch kapitaal. Priezensweard, want ze zeent het natuurlijk neet verplicht. Heel good da’j as grootverdener ook groot geeld stekt in oew club. De clubs zelf zorgt dan wier heel good vuur de geeldscheters. Business seats in de stadions um zo angenaam meugelijk foebal te kieken, luxe skyboxen vuur de zakenrelaties. De beste parkeerplaatsen. En natuurlijk genereert dat geeld vuur de club. Dus wordt de sponsoren met völle ontzag behaandeld.
Mear…a’j barst van ’t geeld, hoe moeilijk is ’t dan um indrukwekkende bedragen te geven an oew favoriete club en doar ook nog allemoal vuurrechten vuur terugge te kriegen…? Kiekt noar de vriejwilligers. Dát volk stek het grötste kapitaal wat ze hebt in de clubs en organisaties: leavenstied. Onbetaalboar, want het koomp nooit wier terugge…
Alle vriejwilligers in oonze maatschappij geeft miej een woarm geveul. Ook vriejwilligers met ne collectebusse an de dure. Want der blieft altied leu oaver dee nergens an metdoot. Ze weelt hoogstens geeld geven as der wat tegen-oaver steet. Een poar joar terugge gongen in ’n klean Twents pleatske jeugdleden vriejwillig roond um lotten te verkopen vuur ’n foebal. Hoofdpries: ne plasma-tellevisie van 2000 euro. De lotten kosten 2 euro stuk. De möage kömmen ook an de dure biej Dieks Ogelink: vriejgezel, vreandelijk, mear froai op ‘n penning. Of Dieks lotten van 2 euro wol kopen vuur ’t goo doel?
Dieks vreug dreks: “Wat kan’k winnen?”
– De möage zeaden: Ne plasma-tellevisie van 2000 euro.
Noh, Dieks wol wal één lot kopen.
Toen vreug’e: “Mer a’k een lot kope, wee’k dan ook zeker de’k dee tellevisie winne?
– Nee, netuurlijk neet, zeaden de möage, het is toch ne lotterieje?
Toen zeg Dieks: “Dan doo’k het toch mear neet, want dat wordt ’t miej toch te deur!”
Gerrit Dannenberg
