Hef ne club nen niejen trainer of coach neudig, dan wordt ‘r nooit ezocht noar nen bruggenbouwer en verbinder? Hef ne gemeente nen niejen börgemeaster neudig, den fealijk ook een team mut ansteuren, dan wordt ’t tóch een aander verhaal.
Börgemeaster Arco Hofland van Riessen-Hoolten scheait ‘r dit joar nog met oet. Mien dochter vreug: “Watvukke diploma’s mut nen börgemeaster hebben?”
Tjea…eagenlijk niks. Iej köant börgemeaster worden zoonder zelfs één officieel papier.
Ze kon ’t hoaste neet geleuwen in dizzen tied vol glaanzende cv’s en juichende LinkedIn-profieln met fantasiecertificaten en bloastestimonials.
Natuurlijk maakt een gemeenteroad een verlangliestje van watvonnen börgemeaster ze gearne weelt hebben. Dat neumt ze nen profielschets. Doar wordt eerst aaltied heel geheimzinning oaver doan, mear a’j ’n betje nuchter zeent, weet wiej al lange wat doar in koomp te stoan vuur Riessen-Hoolten:
– nen kearl of ne vrouwe maakt oons neet oet, het geet um de kwaliteiten
– ze munn minstens twee volle perioden könn blieven zitten, aanders koomp der van niej beleid niks trechte
En dán komt de clichés: het mut nen verbinder wean en nen bruggenbouwer.
Ook al zeent ‘r heelmoals geen depe ofgroonden te oaverwinnen: tóch bruggenbouwer en verbinder. Het hef wat van nen genie-soldoat en nen EHBO’er. Elke roadsfractie geet dat temet keaihard ropen en oonderwiel weet wiej almoal dat ‘t allene mear loze wöarde zeent. En ás ze echte bruggenbouwers en verbeenders zeent, dan krie’j dat woonderlijke slag börgemeasters van tegenwoordig; vuural krusing tusken ne psychiatrische praktijkzuster en nen leraar maatschappijleer dee vroger ook gin orde konnen hoolden.
Loa’w earlke wean: gewoon ’n betje gezoond verstaand is alns wa’j neudig hebt. Hoof neet eens zo heel völle te wean. Met ’n iets meansenkennis um aandere leu heanig in te schatten. Ne eagen meaning en stevigen ruggengroat maakt de gereedschapskiste heelmoals compleet.
Op dit momeant kan ik miej mer enen börgemeaster van dat kaliber herinnern: PvdA-börgemeaster Jan Lonink. Hee köm oet dizze Twentse contreajen en wus wat vuur volk hier wont. Én hee wus ook hoe’j met mekoar umme goat? Hee zea: “Democratie is mear as de helfte plus ene. Het koomp der op-an hoe de mearderheid met de meenderheaid umme geet. Democratie is vuural: mekoar ook eens wat gunnen.”
Tjea…det is wat aans as det getuttel oaver verbeenden en bruggen bouwen. Toen Jan Lonink in 2001 noar Riessen-Hoolten köm warren ’t aandere tieden, mear een niejen gemeenteroad kan der noa meart vuur zorgen det dee tieden wierumme komt.
Gerrit Dannenberg
