Sport en politiek zeent strak an mekoar gebeunden. Op weareldniveau in Peking, mear ook op plaatselijk niveau in Twente. De polletiek kan de sport maken en brekken. Te weainig krieg wiej vuur ’t verstaand dat een gemeenteroad de baas is. Neet de börgemeaster en de wethoolders. Temet kieze wiej wier oonze roadsleden en dee hebt het leste woord in ’n gemeenteroad.
En let ‘r eens op: nieje roadsleden goat vake de verkiezingen in met grote beloftes. Zit ze eenmoal in ‘n road, dan leart ze het polletieke truukje vlot an. Noa twee roadsvergaderingen gebroekt ze al volop dat vreselijke polletieke keunst-taaltje én ze veult zich weareldberoemd in de eagen gemeente. Ze neumt zichzelf geane politici en ze spölt in een gemeenteroad dan ook vake Tweede-Kamertje met oetdagend gedrag richting ’n vuurzitter, lange technische verhalen en de flaauwste woordgrappen woer ze dan hol umme lachet. Gin woonder dat politici neet zonnen besten naam hebt; zeelden geeft ze ‘n rechtstreeks antwoord of ze stelt ne tegenvroage um an de koo-kaante te blieven.
Iej hebt twee soorten roadsleden: dossiervretters en volksvertegenwoordigers. Um te testen of een roadslid te vertrouwen is, zo-j mutten vroagen: “Zi-j nen dossiervretter en of nen volksvertegenwoordiger?” Krieg iej dan as antwoord: “Van beaide wat”, dan mu’j oetkieken. Want der is in dat geval mear één good antwoord: “Volksvertegenwoordiger!” Iej zit ‘r vuur oew kiezers. Zekers neet um moeilijke zwamverhalen op te hangen woer noa twee zinnen gin mens mear noar lustert. Iej zit ‘r neet um te loaten zeen da’j klook genog zeent um met al dee ingewikkelde wetten en reglemeanten ’n aander de vlegen of te vangen. Iej zit ‘r ook neet um op te vallen met vroagen stellen noar de bekeande weg. Iej zit ‘r neet vuur oezelf, zelfs neet vuur dee dikke 1000 euro in de moand dat ‘t opsmit. Iej zeent volksvertegenwoordiger! Dus, börgemeaster en wethoolders good in de gaten hoolden én opkommen vuur de leu. En goat ook vuural noar dee leu hen! Kuijert ‘r met. Dan veult de leu zich serieus enömmen en iej wordt doezend keer mear gewoar as uren dossiers vretten en votspeulen met grote glazen wien.
In Riessen-Hoolten he’w trouwens nog gin klagen. Ook doar he’w van alle soorten, mear het antal verkiezingsposters kan nog royaal op één verkiezingsbrödje. Viej hebt ook nog wal roadsleden dee’j meestal good köant volgen en gin lange toospraken hooldt. En – heel belangriek – ook roadsleden dee niks zegt as der gewoon niks te zeggen is. Ik magge hoppen dat dit noa 16 meart zo blif.
Gerrit Dannenberg
