Intelligente gesprekken oaver de sport kan ik nooit an metdoon. De sportweareld is vuur miej ‘n oetzeunderlijk exclusief milieu. Miene kammeröa en collega’s hooldt hele discussies oaver ’n voetbal. Mangs doert dee gesprekken zó lange, da’k miej compleet boetengeslötten veule. Ik heb doar wat an proberen te doon. Ik leus geregeld de sportpagina’s van kraanten en volgen sportprogramma’s. Mear as Gijp en Derksen oaver sport begint, mu’k dreks ofhaken. Ik kenne nog net een poar voetbalnaams as Huntelaar en Messi, mear he’j ’t ook wal ehad.
Miene kammeröa zeent ook “vuur ne club”. Ze reaist nog nét neet oaveral met hen, mear eagenlijk wollen ze dat ook wal geane doon. Mer doar staat dan wetten in de weg en praktische bezwoaren. Ik vuur miej wil altied geane weten woerumme ze – as inwonner van Twente – ne club steunt in ’t Westen. En dan komt ‘r nen hoop argumeanten dee ik neet kan volgen. Mer dat ‘r nen hoop emotie biej koomp kieken is zeker. Clubleefde is zeelden te beredeneern.
Toch leaf wiej in inclusieve tieden. Iederene mut met können doon an het maatschappelijk verkeer. Nums hoof zich boetengeslötten te veulen. De gedachte doar achter is good. Mear vuur mien sportprobleem is nog ginne oplössing. En ik wil zo geane participeren…mear het lukt neet. Zelfs neet biej miene beste kammeröa. Ze doot ook gin eankele möaite um miej te helpen. As ik of en too ne belangstellende vroage stelle, kiekt ze miej ’n betje sneu an en distert dan gewoon met mekoar verdan. Ik stoa der compleet boeten. Het is nog nét neet zo heftig um de hulpverlening op te zeuken, mear wal vervelend.
Toch zol het makkelijk op te lössen mutten wean. Dizze dage ma’w hen stemmen. A’j gin flauw benul hebt wat te kiezen, is der nen stemwiezer. Een volstrekt onbetrouwboar instrumeant um oet te viegeleren woer de échte voorkeur lig. A’j ook mear iets met de natuur hebt, zit iej dreks leenks in het spectrum. Veul iej iets vuur de strekke, dan kom iej vlot oet biej al dee crypto-fascistoïde partiejen op rechts. Dus vuur de sport zol ik ook geane zonnen stemwiezer willen hebben. Volgens miej is ‘t ne hele kleaine möaite um via zonnen sportclubstemwiezer kats onberedeneerd oet te kommen biej RKC Waalwijk of SC Cambuur. Met het grote vuurdeel dat in de sportweareld zukke onberedeneerde keuzes onschadelijk zeent.
Gerrit Dannenberg
