Ik zir joonk ewörden met de wöarde van ‘t Feijenoordclubleed: “Geen woorden maar daden!” In ‘t Tweants: “Neet köakeln, mer eaier legn!” Mear, oer-clichémoatig mu’k vaste-stellen: tieden veraandert. “Woorden doen ertoe.” Ik mur doar de leste tied heel vake an deanken. Want woorden köant inderdaad zear doon. Wiej wussen dät al lange. Toch he’w al dee tied pal estoan vuur het vrieje woord. Voltaire zea jums: “Ik verafschuw wat u zegt, maar ik zal uw recht om het te zeggen met mijn leven verdedigen.” Mear het vrieje woord bit zichzelf bliekboar in een start. Der zeent al beuker in de verkoop met woordrichtlienen vuur de culturele sector. Kortens ha’k in Zwolle nen workshop biej het Historisch Centrum Overijssel/Collectie Overijssel. Onderwerp: slavernijverleden en fout taalgebroek in musea. Nen helen hoop woorden zeent fout ewörden: neger, Zwarte Piet, blaank, slaaf. Bediende moch ook neet mear, want dät is een verhullenden woord vuur slaaf…
En zeker woar: der zeent woorden dee onaangenaam andoot. Zoaterdagoavend in Deelden har oold-VVD-kamerlid Gertjan Oplaat het oaver de tegenstelling “fienen en roomsen”. A’j doar geveulig vuur zeent kan dat roomsen en fienen raken. Mear ik zir heel bange da’w heanig an in een dreklaand trechte-komt woer ’t eande vot is. Woer wille wiej een verbod op? A’j een woord oet de woord-umgeving haalt, kan alns ne verkeerde lading kriegen. Langs een visviever in oonze wonwieke hef de gemeente een bord too-ezat: “Nachtvissen verboden.” Nachtvissen..?! Dagvissen, oavendleu, dagjesmeansen, zondagsrieders, moandagauto’s, moandverbaand, scheurkalender, zakagenda, kutzwoagers… Wee zal zonnen gevoarlijken index opstellen?
Iej köant deanken: ach, wat kan ’t miej schellen. Toch ontsteet ‘r automatisch al een soort antenne den oe woarschowt dat iets fealijk neet kan. Ik vreuge in mien onscheuld an ene: “Wee’j hoe Alzheimer van vuurnaam het?” Netuurlijk wus’e dat neet. Woerop ik heel fout zea: “Kiek, doar begeent ‘t met!”
Gerrit Dannenberg
