In de sportkraante van ’n Tubantia tel ik op moandagmoarn in de rappigheaid wal dree magnum champagneflesken. Max Verstappen hef de fleske zelfs an ’n moond en op de aandere foto’s spuit ze het edelvocht in de roondte. Ik weet dät Tubantia professionele fotografen inhuurt. Mear kolossaal, watte fantasieloze plaatjes.
Oargerlijk en vuural inconsequent. Draankflesken magnt wál, terwiel tabak kats oet den boze is. Ooit konnen Johan Cruijff en Rutger Hauer schaamteloos reclame maken vuur gezoond roken.
Mear rechtevoort zeent homeopathische segretten al neet mear too-estoan. Zollen voetballers dat in dissen tied doon, dan wordt ze standrechtelijk executeerd op de mildenstippe. Mear met nen magnum draankfleske lig dät bliekboar genuanceerder, zo lange at doert natuurlijk. Good begriepen: ik wil ginnen kruistocht hoolden tegen draank of tabak. Helpt toch niks biej de echte genieters.
Gin creatiever volk biej ’t bedeanken van de meest veargezochte excuses as rokers dee nog neet an stoppen too zeent.
Mer, dät fotoprofessionals neet wat aanders in scene köant zetten biej winnaars as een plaatje met dee eeuwige champagneflesken begeent slim te vervelen. Het maken van digitale foto’s steelt eagenlijk niks mear vuur. Iej maakt ‘r 200 en dan mút er toch wal enen originelen tusken zitten, zo’j deanken. Mear nee: aaltied wier dezelfde champagne-belle.
Ook völle oargernis biej foto’s met sporters dee de duumkes in de loch stekt. Een volslagen versletten en infantiel geboar oet de steentied van Toi-toi-toi bij Ted en Mies Bouwman. An de leu zéé’j ook dudelijk dät een fotograaf vlak vuur ’t ofdrukken heel olijk zea: “Tsjies! En steek de duimpjes maar omhoog!” Vreselijk! Joa, wiej hecht an van vastigheaid en dan krie’j vanzelf dizze clichés. Mear toch…
En woerumme mutten de leu ook aaltied lachend op ’n foto? De meeste uren van ’n dag lache wiej heelmoals neet. Dát doo’w toch allene at ‘r écht readen vuur is. Woerumme mu’w op petret dan allemoal zo vreandelijk meugelijk lieken. Wat wi’j doarmet bereiken? Al te vreandelijk lachen noar onbekeanden dee’j neet eens kent, gef oet ’t anzeen van weekdeer.
En a’w toch gangs zeent; vot met dee standaard elftalfoto’s. De achterste riegel steet rechtop en doarvuur de zitters op de hoeke. Ze deankt dät op de hoeke zitten sportief en lenig steet. Mear op dee manere zitten is niks aanders as de Fraanske toilet-hoolding. Nooit doon. Goat dan gewoon op de groond zitten. En nooit lachen, want iej mutten minstens oezelf serieus nemmen.
Gerrit Dannenberg
