Sport en goede doelen zeent daankboare objecten vuur sponsoren. Mear de geeldscheters van tegenswoordig zeent evolueerd tot een biejzeunder slag Barmhartige Samaritaan. In 2022 zit ze biej de Rotary en de Lions; leu oet de succesvolle kringen dee ‘t belangeloos doot an sponsoring van goede doelen. Meestal geet dät volgens het Salomo-principe dät de leenkerhaande neet weet wat de rechterhaande dut. Het aandere soort Barmhartige Samaritaan 2.0 opereert in een schemerig gebied tusken gedeeltelijke openboarheaid en anonimiteit. Dät volk zit vuural biej de haringparty’s.
De leste wekken vleegt oe de tunkes pekkelhearing um de oren. Kolossale bedragen maakt de haringparty-gangers vriej vuur de leefdadigheaid. In Riessen ha’w Haringparty de Oosterhof van reclame-tycoon Hans Bloemendal en horeca-oondernemmer Guido Meinders. Doar ko’j neet zo mear hen, want ’t wes ’n beslötten feestje.
Wal klook bedacht, want goodn sier maken met good geeld hef ‘t meeste effect biej aandere leu met good geeld. Doarumme ook ne dresscode: tenue de ville. Vuur vrouwleu lechte pastelteenten. Vuur kearls röstige effen kluren. De stroppe mag in de kaste blieven. Vrieje veugeln hooldt zich neet an de klearcode, mear dät blieft de oetzeunderingen. Én iej hebt ook leu dee zich kapot oargert an kledingregels en doarumme votblieft. ’n Systeem van zelf-selectie. Oold-börgemeaster Bernard Kobes der duurhen ekömmen met ‘n doonkerblaauw buis en strohood!
Het goode doel was dit joar Wensambulance Oost-Nederland. Zi-j zelf good gezoond, dan sprek maakt oe de wensambulance de knippe lös. Biej het grote geeld-beedn keken de niejmoodse magnaten mekoar an; ze wollen zich tegenoaver mekoar neet loaten kennen en ’t gong al vlot oaver de ton hen. Doarnoa kömmen de stille gevers dee zonne kaarte inleavert of per tellefon ’n bedrag toozegt. Al met al mos ’n cheque een poar keer worden an-epast. Zelfs vandage nog. In totaal is der 164.500 euro binnen-ekömmen. Groot goan op groot geeld…iej köant ‘r op ofgeven of pochen; het bedrag lig der. Ze hadden ‘t zelf in de knippe könn hoolden, in plaatse van een landelijk Barmhartige-Samaritaanrecord te vestigen. De Wensambulance geet ‘r met strieken. Der zeent slechtere goode doelen.
Gerrit Dannenberg
