Op moandag is het sportkatern van de kraante heel dikke. Digitaal én op papier kö’j oetgebreaide beschouwingen leazen. Ik heb miej of-evroagn of al dee grote verhaandelingn ook wal wordt eleazen. Dat zal vaste zo weazen, want de kraanten plaatst al dee lange sportverhalen neet allene as vulling. Ook op aandere media strukel iej oaver de programma’s met weareldwieze kearls en stoere vrouwleu dee uren laangk distert oaver voetbal en mangs aandere sporten. En ze scoort nog hoge in de kiekciefers ook.
Vuur snelheid van de sportoetslagen hooft de kraanten dee sportreportages neet te plaatsen. Via social media is de oetslag van ne wedstried of wielercriterium dreks oonder de leu. Der is dus mear ene verkloaring vuur alle dee grote sportartikelen en sportalkshows: wiej hebt as mensdom behoofte dan duding. Wiej weelt heel geane weten hoe aandere leu deankt oaver de ontwikkelingen in de Formule1-wearelnd, ’n voetbal en ’t wielrennen. Twee van miene beste kammeröa hebt heel völle verstaand van voetbal. Tenminste, dat deank ik. Ze köant in elk geval hele gesprekken hoolden met mekoar hoe dom Van Gaal dut of dät Rhoda JC nen goodn voetballer hef loaten sketen. Ik zir doar best jaloers op, want as ze mekoar oaver dee sportkwesties biej ’n toef hebt, mut ik miej eerbiedig stille hoolden. Ik heb wal ’s probeerd um de sportkaternen op moandag groondig duur te leazen, zoda’k ook kan metdoon an dat ge-ouwehoer. Mer a’j der oew harte neet biej hebt, hool iej ’t neet vol en geet 90 proceant van al dee sportbeschouwingen langs oe hen.
Feit is dat ‘r in de sportweareld dus moarkt is vuur duding. Dat zollen de kraanten zich nuks an mutten trekken; óók vuur de aandere terreinen woerop ze zich begeeft. Het fabeltje van de objectieve nieuwsvuurziening is al lange achterhaald. Ik wil duding!! Ik wil miene meaning nöast de meaning van aandern leggen. Ik wil weten hoe ‘k ontwikkelingen in Twente en de weareld mut inschatten. Vót met alle sentimentele jaankverhalen woer wiej toch niks an veraandern köant. Ik veend miejzelf neet knieperig, mear doar wil ik mien abonnementsgeeld neet an spendeern.
Gerrit Dannenberg
