A’j mie vuur dartig joar wierumme vroagd hadden wat ik vandage zol wean, har ik neet ezegd: skriever. En nog mu’k wennen an den titel. Kwoade tongen zolden zeggen: iej zint ook ginnen skriever, iej zint typist. Mer dat dut denk ik de typisten wier te kort.
Wat ik dan wal ezegd har? Ik leute anderen oet de klasse aait eerst skreeuwen: Piloot! Brandwearman! Plietsie! Tegen de tied at minne klassemöage oeteroazed warren, wol de meister alwier verdan en ontsprung ik ’n dans mooi. Dan hoven ik doar wieders neet oaver noa te denken. Ik kon wal hele dage tekenen, een betten vuur mie oet dreumen, muziek lusteren al tullend op ‘n doem.
Oh en beuks leazen, vuural ne kinderencyclopedie vund ik machtig mooi. Gin geknooi, gewoon straight facts mienjong. Mer een vast plan had ik der neet met. Op een gegeven ogenblik drukken ik es wat knöpkes in achter ’n komputer. En doar ha’j ne encyclopedie in et Plat. Inmiddels zin ik mien 999e wikipedia-artikel an et oetbreiden. In strak Nedersaksisch. Geet oaver dino’s. En a’j op nen wiki makkelik van de wöörde komt, wil dat vaste ook wal vuur nen klanten, duchten mie op een zeker ogenblik. En joawal. Dus toen ha’k een tekstbedrief.
A’j hele dage skrievt, verget iej nog wal es da’j der met gangs zint. Klinkt misskien gek, mer zo is et wal. A’j mie noe vroagt: zo’j et zelfde wier kiezen? Mwoa, misskien wal. Misskien ook neet. Vanear zaggen ik bie et sportjournaal een baantjen wat mie neet al te meuilik leek. En wat mie ook neet al te völle an de butte zol kommen: formule1-strateeg. As platman denk ik bie zo’n woord direkt: “hey! Sallands verkleinwoord van straat: strategie.“ Mer dat zölt ze der wal neet met bedolen.
De kearls an et skap bie et muziek zollen met ’n kop skudden: “Wat ’n spil toch, woer’t ze de centen al neet met verdenen köant rechtevoord. Vroger stunden wiej met veertene in et fabriek.” Mer ik oordele neet. As Formule1-strateeg zol ik met Max ook wal kampioen worden. Loat den jongen mer veuren, ha’k hoaste zegd.
Een makkeliker baantjen is der neet. As ik temet mienen eersten woarkdag as F1-strateeg hebbe, stoa ik langs de kanten en sputtere mangs in mien pilotenheuvdstel:
“Onmundig hard jagen, Max!”
Martin ter Denge
