Sonja Bakker, Kees Slager, Gijs Groenteman, Michel Montignac, Thea Kroese; ze hebt allemoal een kokbook eschreven. Etten doo’w alledage. Doarumme zeent nieje kokbeuker hele daankboare oetgeef-objecten. Der zeent ook al heel völle soorten kokbeuker.
Ook gin woonder, want het stramien is oaverzichtelijk. Iej beschrieft een stuk of wat nieje gerechten. Met vuural völle verse greuntesoorten, want dät is hot. Gin zuivel, want dät is van vrooger. Ook anroaden um te blieven beweagen en ontspannen. Tussen de gerechten wat vertellen oaver wetensweardige dinge dee past biej ’t kokbook-thema, nen hoop glemmige foto’s van de gerechten en het kokbook kan nöast de kassa biej de Readshop, Cigo en de Bruna. Iej zoln bevuurbeeld ook wal een Twentesport-kokbook können maken. Iej hebt een kleane 30 recepten neudig vuur alle dage van de moand. Doar breng iej de neudige ofwisseling in van de seizoenen. Het mut ’n aander kokbook worden as aanders. Het succes van Montignac wäs indertied da’j gewoon een stevig glas wien konn blieven dreenken. Net as het sherry-dieet en dat was nóg wier oolder. Alns is fealijk van vuur ’n oorlog. Mear loa’w ’s gek doon. In het Twentesport-kokbook doo’w van moandag tot en met vriejdagmoarn gewone duursnee kost van gezoonde dinge as roobeten, sloabonen, zoerkool, duurkok-moos en vriejdagmiddag roond half viewe rauwen andievie. Op vriejdagoawend late nen grootn gefrituurden loempia met völle kip en ham. Op zoaterdag noa de voetbalwedstried oolderwetse Vlaamse frieten met ne Kwekkeboomkroket en völle lekkern zoeren mayonaise. Het mag ook nen variant wean van nen berehap met pindasaus. Later op ’n oawend nog wat dreuge worst. Op zöandag bouwe wiej een betje of met lichter spil as saté-stöks en borrelpoten. Oaver ’t effect van dit gezoonde Twentesport-kokbook hoof iej oe zekers neet drok te maken, want alle diëten hebt gegarandeerd succes a’j de rest van de wekke de helfte meender vret én ’n beer loat stoan.
Moate hoolden is altied het toverwoord. Want goo kunnigheaid van miej har biej bol.com een erotisch kokbook ekoch met recepten vuur de sloapkamer. Umdat hee en zienen partner good gezoond zeent, probeerden ze dat enthousiast oet. Mer ze hebt het book neet oet-ekregen. Hee zea: “Viej warn biej bladziede 37 en ik zea: doo gaauw dichte, want al ’t blood löp miej noar ’n kop.”
Gerrit Dannenberg
