Donderieje in de vootbalderieje (what else is new). Een of anderen spöller wol neet met een klurig bändken et veld op. Gung tegen zien geleuf in. En vanoet Riessender hook was der ook nen hoop bieval. Want der “wör öar wat opedrungen,” meanen zee.
Ik heuge mie nog de catechisatie en Kort Begrip alle wekken, in de gymzale op ne lange banke stoan en nen tekst opdreunen vuur alle eulders woer’j wekkenlank op mosten oefenen en gin idee hadden wa’j zeaden en o wee a’j et verkeerd deden, de dwang da’j alle wekken metmosten um oe “onder de Tucht te stellen” en um et gode verhaalken mer zo strak meugelik in ’n kop in te kriegen, de bangmakerieje “dat der altied Ene is den as metkik”, de zöadjes van kearls met de höarkes in skeiding (doar moch et wal) en vitamine D-gebrek dee anders neet mans genog warren mer oe met een zacht stemmeke leuten meanen dat zee de Woarheid in pacht hadden, de verplichte psalmverskes alle wekken oet ’n kop learen en verplicht metzingen, de meister den stund te jengeln vuur de klasse van een niej härtjen en oe vief minuten later letterlik de klasse oettreud terwiel as dat al lange verböaden was met oew Tuchtcommissie (en dan wier vroom op zien örgel begun te ramenten), de ‘voortplanting’ in stea van ‘voorlichting’ woerduur’j wussen wo et woarken mer neet wa’j der tegen mossen doon met oew hormoonspegel tot achter de oren, en de skaamte van leaftiedsgenoten dee “et elukked was” en vuurin ne koarke met 2500 ofeladene zitplaatsen met naam en tonaam mosten bekennen dat ze zondigd hadden tegen et zeuvende gebod en doarnoa dwungen wörden um te trouwen met leu woeras ze wieders niks met hadden en een leaven van ongelukkigheid en stried temeute gungen. Fein ook vuur de kinder wat doarin mut opgröaien. Mer “et gezin is de hoeksteen van de samenleving.” Mie ducht.
Viefteen joar noa mien leste bezeuk (ne meaningbevestigende grove links en rechts neet meterekkend) smiet ik nog alle dage met halve exegeses da’k der zelf meu van worde. En nog altied met angst en beven dissen column skrieve want wat zöalt de leu wal neet zeggen. Mer nee, ÖÄR wör wat opedrungen.
Newsflash: Dat bändken vrög andacht vuur alle mindere marginaliseerden van onze samenleaving. “Oewzelf können wean.” Dus ook de leu dee een bepoald geleuve anhangt. Dus juust dee geleufsgroepen zollen alle dage met dat bändken mutten lopen. Wat, doar wi’j ne vlagge van op et gemeentehoes hebben hangen!
Oew nöasten leefhebben as oezelf en Oordeelt neet zint van dee geboden wat ik alle wekken anheuren do a’k nog völle jungerder was as noe.
Och, dat ze mer magt bidden um wiesheid.
Martin ter Denge
