Och wat lig ik hier fein. Zeuvenentwentig groad jongs! Metene zingen van Harm: öllie ieleu oe wal in! Et Tenerifaanske zunneke strik mie um et snuutje, een heanig breesken ruselt duur de loom wemmelende palmblader en keult mie et betjen zweet op de hoed. Loat ik es kieken wo as et in Nederland is. Ha’k et mer neet edoan.
Duusterte en donderieje. Skienboar was der wier es wat in vootballand te doon. Marokko hef wat ewunnen in een toernooi woera’w toch al niks te zeuken hadden en oet blinde wille brekt ze allen duvel of. Rellen, ME, oetebrande auto’s, spul kapot etrad, skreeuwen, veur. Wat een feest. In België al niks minder.
Metene krabt Nederland zik an ’n vetten onderbalg. Greet Wilders slingert stokkerige tweets de wearld in (wat al jammer is, want dat medium is ook al vergoane glorie, net as zien achterhaalde beeld van Nederland), met slechte fotosoepte plaatjes oaver deportatie zonder dudelik plan zo a’w van em gewoon zint en allens oaver enen kam. Noe hier nog een gräpken wat den kam verbindt an Wilders zien egene hoarstiel en dan is et lachertje kompleet. Next!
Meteen ook vanoet Marokkaansken hook vingerwiezen noar de inteeltkezeköppe van Feyenoord bievuurbeeld dee op ’n vrömden ook allen duvel an stront brekt. Geliek hebt ze. Want van beide kanten verpest et et neagelskrap vuur de hele hande. Net zuk dom huttenvolk inderdaad en doar he’j et noe krek. Vootbal verbindt: et trekt dom kutvolk, ongeacht (dubbele) nationaliteit.
Loa’w et zo ofsprekken Geert: Wiej trapt vootbal en oe et land oet. Et is net as met veurwoark. As volwassenen zik der neet met könt gedreagen mu’w ze tegen zikzelf (vuur öar egene bestwil en onze gemoodsröste) in besköarming nemmen en ’n helen kroam gewoon verbeden.
Wat ze dan mut doon? Zat andere sporten. Of maakt muziek, dan kan der een ander ook nog van geneten (al betwiefel ik of ze boaven et niveau van öare holbewonerige stadiontrommen oetkomt). Of least es een book, dan zi’j mooi eaven zeute. En as oe dat te lastig is: ze hebt ze al met grote letters en klurige plaatjes der bie.
Et ennigste vuurdeel is dat kolumnisten wier wat te skrieven hebt. Mer jammer at dat mut terwiel a’w vakantie hebt.
Martin ter Denge
