Postdoeven hoolden is ne prachtige sport. De doevenkearls en doevenvrouwleu maakt gebroek van dat hele woonderlijke doevenmechanisme dat de veugeln van heel vear aaltied wier noar de thoesbasis teruggekomt. A’j neet geleuft in het belang van de doevensport, least dan het woondermooie book “Een duif en een jongen” van een Israëlischen schriever Meir Shalev. Dan begriep iej better hoe dat zit met dee doevenleefde van de doevenmelkers. Mear um postdoeven nóg harder te loaten vlegen, zeent ‘r de zogenaamde “weduwnaarsvluchten”: een poartje doeven hef met mekoar jongen. Het mänke loat ze metdoon an ne wedstriedvloch en um zo snel meugelijk wier biej de jongen te wean, koomp het postdoevenmänke heel hard terugge-evlöagn. Tjea…
Een kammeroad van miej bracht vroger een eandekuken met van de moarkt. Dee kleane eande leup um oaveral achternoa, want det eandekuken dachen det dit zin moo of vaa was. Best zielig, vuural toen dee eande grötter was. Mear fealijk doo’w met jonge heunde precies hetzelfde. Heel joonk hale wiej nen pup vot biej de moo en umda’w um persoonlijk groot brengt, geet den hoond zich mear hechten an ’n meanske in plaatse van an zin eange soort. Tjea…
Bepoalde veugelsoorten ma’j neet in de volière hebm, umdat ‘r ooit heel weainig van warren: kleane zangliesters en veenken. Tjea…
Van wat veugeln zeent ‘r heel weanig; korhoenders bevuurbeeld. Toch ma’j ze – net as hennen – gewoon hoolden in ne renne. Ze lengt dan gewoon eaier en dan krie’j doar ook gewoon korhoenderskukens van. Op ’n Hoolterboarg zette viej korhoenders oet, dee’w helemoal oet Zweden haalt. Mear umda’w de vöske neet doodscheet en de roofveugeln ’t heel good doot, blif der natuurlijk gin korhoenderskukentje in leaven. Viej weet det en toch goa’w der gewoon met verdan. Tjea…
Zo too-verdan zit ‘r mear korhoenders in de ambtsketten van de börgmeaster as op ’n Hoolterboarg. Tjea…
Viej hooldt olifanten in Emmen. Den veerkante meter industrieterrein doar neume Wildlands. Mear dee olifanten kriengt gewoon jongn en iej zeet det ze zich heel comfortabel veult.
Viej beticht de veehoolders dat ze de melkbeeste een “hels bestoan” doot. Mear dee melkbeeste leawt wal in ‘n kuddeverbaand…beeste zeent net zukke kudde-deers als leu. Nen hoond, den ’t heel good noar zin meanskenbaasje lustert, hef gewoon ne heugere vorm van bewustzijnsvernauwing… Ze stamt van de wolven of en dan goa’j drietn op commando van ’n meanske den oe oetlöt an ne lange katrolle.
Viej verbeedt good verzorgde herten in een hertenkamp: nen reebok met een stel mooie hindes mag ineens neet mear.
Wee is der gek?
Gerrit Dannenberg
