A’j ergens an verslaafd zeent, wi-j doar het leefste neet of. Dät is ook hét kenmoark van ne verslaving. Ne verslaving maakt ook veendingrieke, want wat lekker is wil iej vaste-hoolden. Leu dee ’t oarns neet mear magt roken, prakkezeert van alns oet um tusken beaide toch eawen te können roken. En a’j per se weelt roken is der aaltied wal ne pisboskop um ’n deampke te doon. Het heet neet vuur niks ne pisboskop: oonder het mom-van-eawn-hen-pissen, gaauw eawen hen roken. Detzelfde geeldt vuur leu dee ’t heel geane ’n bortje lust. Um oewne verslaving te camoufleren begeent dät al met een verkleanwoord: ginnen borrel mear een bortje. Kleenkt ook heel aanders: Meriens lust geane nen borrel. Of Meriens lust geane ’n bortje. Alns wat slecht is vuur ’n meanske make wiej geane kleaner: segretje, segöarkn, bortje, gleaske beer, fleske beer. Vroger heetn nen halven liter beer zelfs ’n fleske beer. Later kree’j piepkes beer en dät neumden ze heel lange: ’n half fleske beer. Of ook wal: dieetfleskes. Almoal camouflage.
Ook de geleagenheaid um an het verslavende product te kommen wordt vake camoufleerd. Ik mur eaven ne boskop doon. Jea, ik leupe Dinant Nieuwenhuis teegn de hoed an en zengt dan eens nee. Eawen socializen, dät mut mangs. Vake wordt ook vergaderingen later op ’n oawend epland, want at dan of-elop is, is ‘t precies de geschikte tied um nog eawen gezellig noa te dieseln en det doo’j neet met een glas kaarnemelk.
Ook de wetenskop wordt ‘r vake biej-ehaald. At ‘r nen professor hef ezegd det twee glazen wien per dag gezoond is, dan wordt dät heel vake an-ehaald. Twee glazen….mer watvonne moate? Dick van Werven har zich glazen ekoch woer ne halve fleske wien tegelieke in kon. A’j der doar dan 2 gleaskes van nemt, noh jea. Min schoonva zea aaltied at’e een fleske beer nöm: “Een dokter zea tegen miej: iej munn völle dreenken!”
Ook de neet-verslaafden um oe hen zit aaltied vol met goo adviezen, dee der vake toevallig op dale komt da’j neet mangt roken en nit mangt dreenken. Zo gong ’t ook Jehan van Berkum. Hee mos met ’t oge hen opereern an staar. Ziene vrouwe zea ’n oavend vuur de operatie: “Dan ma’j vanoavend ook gin beer, want dät is slecht vuur de operatie.” Met een deftig geboar haalden Jehan een folder van ’n dokter vuur een dag en zea: “Ik zal oe vuurleazen wat hier steet: u hoeft niet nuchter te zijn!”
Gerrit Dannenberg
