Wat he’j der gekken tusken. Wat leu hebt et neet helemoals terechte in ’n kop. Doar mu’w rechtevoord vuurzichtig oaver kuiern, want ze köant der zelf niks an doon. Zegnt de gelearden dan. Klopt wal. Sommigen skrievt bievuurbeeld kolumns en doar doot ze niks an. Dee magnt ook gewoon vriej löslopen.
Oaver löslopen esprökken. Holdt de hunde an de liene. Want iej weett nooit wat ze in de busken vindt en opvrett. In Riessen is der namelijk nen seriemoordenaar gangs. Den smiesterd dut vergif in nen bol worst (of ik wete al geheels neet wodöanig as he et versiert) en löt dat expres oargens achter woeras he weet at völle hunde komt. Woer he’j dan oew goodwies?
Zo’n deer dech: “ha lekker!” Hapsloeket et vort en vuur a’j et of köant griepen he’j den oarmen blood stoekend en broesbekkend in de mande liggen. Al dree hunde is et oaverkömmen, mer ene kan et noavertellen. As he kuiern kon. Dree te völle.
Seriemoordenaars begint vake met deers. Gekke Willempie van Eijk bievuurbeeld, den had der as junken al wille an um eanden dood te treaden, katten te verdrinken en hunde te mishandelen. Zien egene breurs neumden em ‘et kwaad zelf’. Hee vermoorden oeteandelik vief vrouwleu. Of Jeffrey Dahmer oet Amerika. Den zochen dooie deers langs de kanten van de weg um oet mekoar te halen, vuurdat em dat neet genog mear opporken en hee mer an leu begun. Of körter bie thoes: Rudolf Käsebier, de Beul van Twente. Dan he’j et toch ewunnen, of nit dan, as dat oewen bienaam is.
Et kan der good ene wean den’t zik oargert an hondeköttels. (Al zee ik der heel völle aait netjes en gedwee achter öaren hond an duur de hoeken goan met zo’n zäkken um de hande). In et geval van Riessender hovenier GJ van de Moane (den’t trouwens nog ginne strontvlege kwoad dut) kan ik mie de oargernis good vuurstellen. Den davert der bie et grösmeeien met ’n zitmeeier in de wegstand oaverhen, dat em de sputters um ’n kop vleegt.
A’j een betten normaal in ’n kop zint, kö’j der leu ook gewoon op ansprekken. Of zo as mien olden buurman, den as ooit ne dikke moppe in ’n hof had liggen en der een brödjen bie nöast zatten met ‘bedankt voor de keutels!’ der op.
In Riessen löp dus nen beul. Nen drietebeul. Of hee hef nen hekel an hunde. Of et is gewoon nen roaren sadist. In ieder geval te gek um lös te lopen. In ’t hok der met!
Martin ter Denge
