De leste joaren wördt der völle kuierd oaver drillrap. Et zol anzetten tot geweld, de leu dee’t der an metdoot stoat al met een been in de bak of slimmer, de groepen stekt mekoar um niks an de grepe.
Vuur sociotropologen is et natuurlik prachtig. Wat geet der umme in zonnen groep, wat drif öar? Nen 14-jöarigen kan wal stoer kuiern oaver dikke auto’s en oewen vrindin inpikken, mer wo serieus kö’j et nemmen?
En doarbie: Iej mut wal wat te doon maken, want anders he’j niks um oaver te rappen. Zo drief iej de scene vuuroet, want dat gef wier nieje inspiratie vuur nieje tekstuele hoogstandjes en da’s good vuur de leavensvatboarheid van de kultuur.
Is et neet feitelik ene grote grappe? En kan ik dat ook? Dat hebt bievuurbeeld Pete & Bas ook edacht, de nieje drillrapsensatie oet et VK. Let wal: Pete & Bas zint dik in de 70. Pete zienen kleindochter zatten es wat op in ’n auto do as hee öar van skole halen. ‘Dat kan ik ook wal,’ zea hee. En doar hef hee geliek an.
A’j ze vuur et eerst zeet lach iej. Twee opaatjes dee kuiert oaver coke-deals en leu duur de knene sketen. Dan goa’j es good lusteren en denk iej: dat zit verästig strak in mekoar! Dikke bars, zo as dat het. Spiekerharde vernemstige teksten, riemend van vuur töt achter. Bas ziene grafstemme (hee geet der al mooi opan) is ne mooie ofwesseling van Pete zienen slieptol. Past op, liekt ze te zeggen, wiej goat op de tachtig an dus wiej hebt gin tied mear vuur oewe bullshit, an de kanten. Pleart der een blauw pilleken in en oewen vrindin wil neet mear wat anders. “Just stepped out, I had to step in, one of the young boys took a hook to the chin, the bouncer came out and he got weighed, in I put the foot down on the clutch and spin, burn that rubber like I’m Michelin, five-star food that I dish to them.”
Rappende oldvaders dee’t hele festivals platspölt. En de grötste gansterrappers loatt verbleken. Want anders as öar hebt P&B écht een heel leaven metemaakt.
Dus a’j meant da’j oewe gode tied vuurbie zint, kiekt dan es noar Pete & Bas. Der is nog hoppe.
Martin ter Denge
