Toen ik gistermoarn terugge fietsen van de sportschole noar ’t hoes, köm ik op ’t industrieterrein Mark Hovink tegen. Hee har een gries bewakersboezeroen an met knalgelle strepen op de mouwen. Hee keek stoer en ongenaakboar van zich of, terwiel hee as gewoon börger aaltied heel vreandelijk is. Doot leu een uniform an en ze zeent ineens belangriek. Stelt oe toch eens vuur dat ’n aander dech da’j neet wat vuurstelt.
De oonderscheaidingstekens woarkt ook bínnen de beroepsgroepen. In plaatse van oet te vigeleern of de persoon te proemen is, kiekt ze eerst noar de stearns en balkens um te in te schatten wat de kearl of de vrouwe weard is. En doar kö’j oe machtig op verkieken. Ruggegroat hef neet zo völle oet te stoan met al dee glemmige speeldkes en medallies op ‘n jas. In miene jonge joaren leus ik in een stripbook van Suske en Wiske ne ruzie tusken Lambiek en nen generaal met een stökn oonder ’n oarm. Den schreeuwden: “Als je nu niet ophoudt, dan ransel ik je uit je hemd!” Woerop Lambiek zea: “Ook zonder hemd ben ik nog altijd Lambiek. Maar als ik jou uit dat uniform ransel, ben je niets meer.”
Natuurlijk zeent oonderscheaidingstekens ook praktisch. Iej zeet in enen oogopslag woe’j rekkening met köant hoolden. Iej köant ‘r communicatiestoornissen met vuurkommen. Mear hangt ‘r astebleef geen oavergewechte an. Het geet ‘r jums umme dat een dreager van de onderscheaidingstekens presteert, het verschil kan maken, wat op een wal kan sleppen of een persoon is woe’j gewoon van opan köant. Is dát het geval, dan kan een dreager van de stearns en balkens ook zichzelf relativeren. Leu dee zichzelf neet altied al te serieus nemt, zeent de meest angename leu um gedoo met hebben. Doar hool iej het lengste met vol.
’n Amerikaan W. E. B. Griffin, schriever van de leagerserie De Wapenbroeders, verteelt oaver de briljante overste Craig Lowell den ne aparte medaille krig van nen koning oet het Veare Oosten. De oonderscheaiding is ne tamelijk grote gooldne plakke an een lila leent de’j um ’n nekke mutten hangen. Soldoaten hebt nog wal ’s feestjes woe’j in vol ornaat hen munn. Dan kan ’n aander jums zeen da’j wat vuurstelt. Natuurlijk kreeg luitenant-kolonel Lowell dan geregeld de vroage woer hee dee vrömde oonderscheaiding van had. Dan zea-r-e: “Die heb ik gewonnen bij een bowlingwedstrijd.”
Gerrit Dannenberg
