Ene van de vrömdste bevolkingsgroepen veen ik motorleefhebbers. Neet verkeerd, mear woonderlijk. Wi’k ‘t nog ne keer apart oaver hebben. Eerst dit. A’j motorfanaatn vroangt noar het mooie van de leefhebberieje, dan zegt ze: “Het ultieme vriejheaidsgeveul.” Wal ’n betjen vrömd, want iej mangt ‘r neet op jaagn zoonder ‘n speciaal motorriebewies. Neet zoonder helm op. Iej mut beschoarmende kleare an, aans hool iej biej ’t vallen gin vel mear oaver bot. Iej mangt neet zo hard jaagn a’j gearne weelt. Iej mangt neet op alle weage kommen. Het ennigste wa’j zelf mangt beslissen is wonnéár a’j op oewen tuf weelt jagen. En dan toch neumt ze dat “ultieme vriejheaidsgeveul”.
Zelfde verhaal vuur ’n auto. Doar he’j een apart riebewies vuur neudig. Noa ’t instappen mu’j, van de verzekeringen, nen ongemakkelijken gordel umme. Op wat stukke weg ma’j neet eens härder as 30. In alverdan méár steadn ma’j met nen diesel geent mear kommen. Zelfs op de snelweg meest 100… Priezige benzine, deur oonderhoold, hoge belasting en betaalde apk-kuring… en dan toch “het ultieme vriejheaidsgeveul”. Iej mangt ’n oewen eagen auto oet de garage haaln wonnear a’j zelf weelt, mear dat is dan ook alns…
Vrachtwagenchauffeurs dito klets. Vroger warren het vrieje jongs. Wa’j eenmoal oonderweg, dan wa’j eagen baas. Gin meanske zag of heurden oe.. A’j mear zorgden dat oew vracht op de plaatse köm. Mear de nieje lichting vrachtwagenchauffeurs is oaveral op de wearlend te volgen duur de logistiek-leu. Zelfs a’j oarns te lange stille stoat, mu’j oetleggen woerumme?
– Kon nit verdan jaagn, want ’t rechter boetenspegel lea der of.
Rechter boetenspegel? Mear doar kö’j toch wal um verdan jagen?
– Nee, want de vrachtwage lea der boawen-op!
En zelfs de vrachtwage eaven vuur eagen plezeer gebroeken mag neet… En toch zeg de jonge generatie chauffeurs: “Ultieme vriejheaid!”
Zet doar de fietse eens tegenoaver. Gin fietsbewies neudig. Ginnen helm, gin speciale kleare. Hoaste oaveral ma’j der met kommen. Der hoof gin benzine in. Ginnen fietsgordel hoof umme en iej mangt ‘r zo hard met jaagn a’j weelt. Het is logisch da’w de fietse tot hét symbool van “de ultieme vriejheaid” maakt. Joa, de fietse-zoonder-batterieje, want elektrisch fietsen hef natuurlijk niks met echt fietsen te maken.
Gerrit Dannenberg
