Stelt oe vuur da’j een meaken van negen zint in Afganistan. Zo mer een meaken in Herat, de doardegrötste stad van et land. En oew vaar is generaal van et leager. Op nen dag komt der kearls met tulbände, böarde en gewearen. Dee lokket oew vaar in de val en skeett em dood. Pats, ofelop.
Dee kearls wilt de sjaria invoren. Oew moor, den as heuvdmeister is op de skole, en oewe veer zusters en iejzelf hebt te lustern. Skole he’j neet mear neudig, doar krie’j toch mer roare ideeën van. Iej mut handwoarken learen en binnenblieven. Allene oaver stroate is der neet mear bie.
Iej vluchtet as 11-jöarigen met oew moor en zusters via Pakistan. Iej dörft nog niks te etten oet bangigheid da’j noar de wc hen mut. In Italië wor’j achterin ne vrachtwage laden. Iej stapt oet ’n achterbak en op de vroage woer’j zint, zeg nen kearl: Denemoarken. Iej komt in een asielopvang terechte. Doarnöast dut de plaatselike voetbalclub trainen en dee skeett nog wal es nen bal oaver et hekke. Vanof dat ogenblik loa’j ginnen bal mear lös. An de andere kante van et hekke vroag iej o’j met magnt doon. ‘Joawal’. En zo kom iej en oewe zusters te trainen met de kearls van Aalborg.
Lang verhaal kort: Iej valt op duur oewe techniek en fealheid. De Deense jeugdselectie zut et ook. Mer iej hebt nog gin stoatsbörgerskop. Nog eerst joaren wochten, en voordan trainen. Mer et geluk is dat oew moor ne goo leararesse is, den as better woark weet te kriegen an de universiteit van Oarhoes. En doar zit de club Skovbakken kortbie. En dee zeet da’j heel wat könt. Da’j heel wat wilt.
Um wat vuur de Afgaans-Deense gemeenskop te doon zet iej een team van zeuven spöllers op, zodat meakens leart dat der ook wat anders is as kokken en neeien. Al gauw he’j zeuven teams. Et is 2008. Iej kriegnt oew stoatsbörgerskop. Et nationale elftal en ne internationale loopbane wocht.
Nöast vootballen doo’j ook nog geneaskunde studeren an de Universiteit. En umdat et allemoal neet vuur niks is, mu’j der ook bie hen krantenlopen. Oewe zusters doot et ook neet verkeerd trouwens. Diana wördt Deens Kampioene in boksen. Giti dut ook vuur dokter an de universiteit en doarnöast nog professioneel vootballen.
Dit is et verhaal van dokter Nadia Nadim. A’j nooit tegenslag kent, mean iej dat et aait mer vanzelf geet. A’j wat wilt, mu’j der zelf achteran.
Martin ter Denge
