Oordöppe in de sportschole. Doar is altied al knetterharde muziek an, mer bliekboar fout. Vandoar extra döppe in de oren. Sport verbroedert (m/v), mear dat is al lange in-ehaald duur de feiten van dizzen tied. Iej loat met döppe dudelijk oetkommen: ik luster noar miene eagen muziek dus neet met miej kuijern. Koomp biej: leu met eagen oordöppe én harde muziek der umhen heurt zichzelf ook neet. Ik heb zelf nooit oordöppe in, want ik heb mear as genog an dee keaiharde muziek oet de pafondboxen.
Vurige wekke was ’t geluud kapot in de sportschole. Onweazenlijk stille. Mer toen heurden iej al dee oordop-leu krönnen as oarme deers. Dat doot ze aaltied, mear dan vaalt het neet op én ze heurt het zelf ook neet vanweage dee oordöppe. Machtig oargerlijk:
Hmmmfffff
Oewwww!
Hnnnnnnnggghhhh!
Oooooowwww!
Primitieve poaringsgeluden. Wiej valt terugge in oons vroogste asociale stadium. En dat biej het beoefenen van sport as sociale activiteit biej oetstek.
Een aander soort ver-asocialisering zeent dee grote zunnebrille. Dee hebt rechtevoort strakke brilpoten, dus iej köant ze ook hoge op de harsens zetten. Doot nen hoop leu ook met ‘n leasbril. Vroger zatn dee leasbrille iets boaven de ogen, nou heugerop. Zunnebrille ook; vake um lange höare biej mekoar noar achtern te hoolden. Dan hef ’t nog nut. Mear alverdan veaker hebt leu nen zunnebril op terwiel der geent gin zunne is. Zal wal sportief stoan, deank ik dat ze deankt. Mear iej köant op stroate gin meanske mear wierkennen! Ik zegge de leste tied goejndag tegen heel völle leu dee’k neet herkenne. Dikke kearls op magere wielrennersfietskes met nen groten bril op, want dee weelt natuurlijk neet herkend worden. Kan’k begriepen a’j vacuüm verpakt as ne rollade oaver ’t asfaalt snöajt. Mear dan gewone leu; kolossale zwarte roeten vuur de harsens. Doar wordt allene Ray Ban better van.
Wiej zeent met ’n aln asociaal sportief ewörden. En bliekboar zir ik ’n ennigsen den doar niks an veendt. Wiej weelt neet mear met mekoar kuijern. He’w gin zin mear an. Communiceren doo’w via social media met supersnelle meaningsvorming in de openboarheaid en dus kö’j nooit oew eagen foute meaning inruilen vuur nen bettern. Eagenlijk heb ik hiermet ne nieje betekenis egeven an het begrip sociale media.
Brave new world… doar geet ‘t op-an.
Gerrit Dannenberg
