Et lik wal of wiej der een betten oaverhen zint. De politieke popiejopies. De gauwe gifbekkerieje, rap stemmen hoarken oaver de rugge van hele groepen, met dunne meaninkjes en bloazerige ego’s woer’j dwars duurhen prikket. Bidetjen, woer zee’j ne nog? Inmiddels al oargens intern? Leagervest ummewesseld vuur dwangbuis? Al dee splinterpartiejkes. Met splinters in de handen kö’j neet duurpakken.
Greet van de PlucheVerslietersVerenige, ja den zit der nog. Mer dat is de onderloage, dee he’j gewoon neudig um oaverhen te beden. Een betten zo as dat oewen eum op Markplaats een beginbod dut op dee kaste dee’j neet vuur nop kwiet wilt umda’j ne dan net zo good zelf in mekoar köant treaden. As hee der ne keer de hennen opzet, beed iej ook eaven de eerste poar tientjes. Zo krik iej met mekoar de bool wat op. Um greunte te verbouwen mu’j der mangs ook eerst ne loage driete onder spitten.
En toen köm Klientje. Den deed ook skreeuwen. Van: ‘Wiej goat et oplössen! En allens blif zo et was.’ En alle leu dee’t noargens verstand van hebt mer wal heel bange vuur verandering zint en dee’t ook nog magnt stemmen skreeuwden met: ‘Zee geet et oplössen! Zee’j wal, et mag net zo krom blieven as et was.’ Puntje bie pöalke, ze hadden good noadacht oaver wo as ze et hardste skreeuwen mosten. En verrästig, et was nog elukked ook. Wat noe? Een plan um et op te lössen? Ja hallo, doar he’w neet vuur duureleard.
En toen was doar Omtzigt. Heanig. Gin geskreeuw. Gin hardtigheid links of rechtsumme um de leu met te kriegen. Ook niks happig op de heugste bane. Zetels hoarken? Niks van an, kö’w toch neet woarmaken. Doot mer heanig an. Ze hadden em al es ewipped. Kö’j wal doon, mer hee wippet gewoon wierumme. Inmiddels zint de wippers zelf vort en kump hee wier.
Hee is der ene van met mekoar vuur mekoar. Noaberskop, mer dan iets roemer. Degelik. Keurig in pak. Dree keer noadenken en dan nog neet allens zeggen. Kennis van zaken. Lane Assist an, dus a’j te wied noar links of rechts skippert dat oe et spul vanzelf de gode richting indrukket. Grundlich, pünktlich, et gröttere belang vuur ogen. En umdat hee dat dut, mut et een ander ook, um neet nog mear vuur gek te stoan as ze al deden. Ene van ‘wir schaffen das’, mer dat pas zeggen as der al een plan vuur ligt.
Duuts hoaste. Ja. Deutsch. Kanzler Peter Umtsicht. Stoffig, saai, mer wal stabiel. En standvastig. Wiej hebt mear Duutsigheid in de Nederlandse politiek neudig. Zal Baudet mooi vinden.
Martin ter Denge
