Ik zir nou te late, mear aanders ha’k in november met willen doon met miene eagne nieje partieje: de Partij van de Voetbal. Gin moeilijk gedoo met dikke partijprogramma’s dee ’t gin mens les. Gin gemieter oaver loaten duurrekkenen duur het Algemene Rekkenkamer. Gewoon: nen smak geeld vriej maken vuur volkssport nommer 1 en dan wieters nit drammen. De PvdV dut zien beste het gefoebalte gewoon duur te loaten goan. Neet lullig doon oawer ’n kleain piepke veurwoark op ’t veeld. In het neet-duurgerekkende partijprogramma steet dat de goodn nooit oonder de slechen mangt lieden. Neet te völle oaverhoop halen; doot mear gewoon dan doo’j gek genog.
Ook har eköand: e PvdD. Nee, nit van de Dieren mear Partij van de Dialecten. Ha’k geane willen hebben. Gin moeilijk gedoo oaver de oorzaken van de totaal lösse weareld en dat dialecten doar fiks oonder liedt. Maakt gin drol oet. Oorzaak en gevolg? Doot neet meuilijk. A’j toch oaveral wat op oet weelt doon. Gin kemoosjes. Wee’j wat? Doot plat. En vuural nit drammen oaver de schriefwieze, want doar wordt ’n meanske neet gelukkig van.
En woerumme ginne Partij van de Dieren? Noarns vuur neurig. Neet umdat Esther Ouwehand alsnog stiekem een betje votgeet. Neet umdet Ouwehand de macht hef erökken en wil metbesturen in plaatse van te bliewen getugen. Ook neet umdet Harry Mulisch de leste joaren Partij van de Dieren stemden. Mer gewoon umdat Ouwehand en kesjorten der stoomp nöast met de jagers en de slagers. Ze hebt geliek oaver de bioindustrie, mear zit ‘r kilometers nöast biej de jagers en zekers biej de slagers. Ik heb zelf joaren lang in de slagerieje woarkt en ik heb zeelden een slag volk met-emaakt met méár respect vuur de deers as de slagers.
Echt woar, ik heb nog nooit nen slager ezeen den ne koo of voarken nen schuppert verkochen. Ech woar, alle deers wörden met zachte drang noar de slachtbaanke eleaid. Gin getrap, gin gestoot of gemartelte. Ik heb wál ezeen dat slagers de beeste androkken, mear zeker ginnen kop der oftreuken as ze neet lopen wollen. Nen slager weet ook det stress vuur ne koo of een voarken heel noadelig is. Het stresshormoon zorgt vuur nen wee smaak an het vleais. Het wordt ‘r ook toai van. Ne koo of motte schuppen en trappen veroorzaakt bloeduitstortingen en a’j dee in het vleais hebt zitten, wordt grote stukke vleais onbroekboar en det betekent schade.
Doarumme hoof Esther Ouwehand van miej ook neet terugge te kommen. Ne partieje den jagers en slagers te noa keump, ruil ik geane in vuur de PvdV.
Gerrit Dannenberg
