Grote bedrieve dreeit onze sproake ’n nekke umme. Facebook, YouTube, Google, Microsoft, ze woarkt der allemoal an met.
Nemt noe miene podcastriege vuur Wearldsproake. As ik doar nen video van bakke en den op YouTube op wil zetten, begint de donderieje direkt: ik mut angeven wat ik in den video kuiere. Dat mag ik neet zelf invullen, mer mut ik oet ne lieste oetzeuken. Non, ik kan an dat moesrädke dreeien töt tokommend joar moandag, mer Nedersaksisch, Plattdeutsch, Low Saxon of Low German steet der in de lieste neet bie tusken. Loat stoan Twents of Riessens.
Good, ik kan et der ook opzetten zonder sproake te kiezen. Mer dan kan YouTube neet oetdoktern vuur wat vuur publiek as et is. Dus krig et nums ooit te zeen.
Dus mu’j kiezen oet wat der et meest op lik. Nederlands dan mear. Mer dan leeg ik. Want Nedersaksisch is gin Nederlands. En dat weet YouTube ook. Of naja, a’j uploadt, geet YouTube an et noakieken an: klopt de keuzene sproake met wat et algoritme as Nederlands keant? Nee natuurlik neet. Lik der in de vearste vearten neet op! Hoppa, rode vlagge! “’n Inhold van dissen video is neet te vertrouwen!” skreeuwt ze bie YouTube. “En Nederlanders dissen video anbevelen? Hah! Veult der oe es an.” Et publiek krig dus per saldo nooit miene video’s te zeen.
‘Ja koezen, woerumme doo’j et dan ook neet in et Engels, zo as normale leu,’ heur ik oe denken. Mer dat is et punt juust. A’j wilt at Nedersaksisch online metkump en een grötteren krink bereikt as ‘n gemeudeliken griezen golf, mu’j der achteran. Et tegenstriedige is dat as ik mear andacht vuur et Nedersaksisch wil, ik juust gin Nedersaksisch mut gebroeken. Wat ne krange wearld, of neet dan.
Feitelik kö’j et de grote bedrieve ook neet kwoalik nemmen. Dee taallieste op YouTube is lange zat. Van dee sproaken zint de leu et tenminsten wal oaver ne standaard eens ewörden. Dus komt dee good met. Nedersaksisch neet. As de sprekkers zelf al te egenwies zint um mangs wat water bie ’n wien te doon, wat mu’j dan? Et is neet öaren skold dat wiej der zonnen kroam van hebt.
Op alle meugelike wiezen is et op et ogenblik makkeliker um gin Nedersaksisch te gebroeken as wal. En iej köant alleman de skold geven, mer de grötste sproakenkillers zint de sprekkers zelf.
Dood eknuffeld of dood ezwegen. Beide neet best.
Martin ter Denge
