Bert Groothengel steurden miej een verhaal oet Trouw oaver LinkedIn. Toen LinkedIn ooit begun leek het een haandzaam platform te worden vuur oondernemmers en leidinggevenden. Iej konn der mekoar op terugge-veenden. Iej konn loaten zeen wa’j an opleiding en ervaring hadden. Heel makkelijk a’j zaken weelt doon of an ’t zeuken zeent noar de vrouw/man woer iej verleagen um zit.
Allene jammer det LinkedIn niks aanders mer is as facebook of instagram vuur exhibitionistisen. Familiefoto’s, personeelsjubilea, oetstapjes, kasborrels, nejoarsrecepties en vuural zalverige zeikteksten vuur de opdrachtgevers “waarvoor we een mooie opdracht hebben mogen doen”. Vuural dat “mogen”. Kearl-an-gen-eande!! Nen jongen en succesvollen oondernemmer heb ik ’t plateain vuur de plate zegd: nem iej oezelf serieus of neet? Iej stelt ne fatsoenlijke offerte op met ne betrouwboare pries-kwaliteitsverhoolding en in redelijkheaid met ne marge vuur oezelf, want iej munn ook leaven. Een opdrachtgever geet ‘r met akkoord. Dan goa’j toch op LinkedIn neet zeggen de’j zonnen opdracht hebt MOGEN doon?? A’j méér geleuft in een aander dan in oezelf, wordt dan mear vriejwilliger op de deern-ambulance.
Mer wat nog völle slimmer is: de informatie oaver de personen zelf is totaal onbetrouwboar. Elke opleiding en cursus woer ze zich ooit vuur op-egeven hebt wordt pontificaal vermeeld. En iej köant nooit zeen of der ook een diploma vuur ehaald is. Heugstens joartallen en dan ma’j zelf roaden of ze dee opleiding hebt of-emaakt of neet. Ik geve ze groot geliek, mear ik zegge der dreks biej: geleuft nooit wat doar steet.
Windowdressing. Vrachtwagens gebakken loch. Zelfs leu dee gin drol oetvoerden op de skolen, presenteert indrukwekkende wapenfeiten. En wat teelt der eagenlijk? Succesvol wean in ’t zakendoon hef neet zo völle van doon met oew opleiding. Een schoarp kearlke as Mark Rutte hef ’t joarenlaank neet vearder ebrach as Algemene Zaken in ’n Haag. Donald Trump is pas in zinne noadage de polletiek in-egoan.
In mien eardere oonderwiesleaven steun ik tusken twee lessen duur in de dure van het lokaal. Ik har ne gymnasiumklasse binnen zitten dee ’t eaven pauzeerden. Oaver een gaank köm ne jonge langslopen oet de i-ofdeling. Hee keek noar binnen en vreug: “Bint dat dee lui dee zo goed kunt leren?” Ik zea van joa. Toen zeg hee: “Ah, dee kunt later mooi de boekhoolding doen!”
Gerrit Dannenberg
