Een lesten Duutsen keaizer Wilhelm II dee an hoolthaksport. Toen hee noar Nederlaand köm in 1918 wes’e eerst aanderhalf joar op kasteel Amerongen, mer al vlot kochen hee Huis Doorn vuur 50.000 geulden.
Noa een Eersten Wearelndoorlog har ‘n keaizer oaverdag niks nuttigs mear te doon. Mear biej Huis Doorn was nen hoop bos en doar dee’r-e hoolt hakken. Hee rookn geane segretten, dus völle loch zal de man wal neet oaver hebben ehad, mer toch….hoolt hakken. Zo völle hoolt har’e zelf op Huis Doorn neet neudig, dus gaf hee nen hoop hoolt an leu in Doorn dee ’t neet zo breed hadden. Op ziene treinreaize duur Hollaand noar Maarn steunden in 1918 nen hoop leu langs de spoerliene um Wilhelm oet te scheelden. Mear in Doorn warren de leu gek met um. Hee wes vreandelijk en kon wat missen. Gin woonder da’j dan neet kapot köant.
Huis Doorn is ene van de meujste museums dee’k kenne. Zoaterdagmiddag wa’k der nog wier eaven. Doar heurden ik van nen subliemen roondleider een woonderlijk verhaal oaver ene meester Jan Kan (1873 – 1949). Dissen Kan oonderheul de contacten tusken Wilhelm en de Nederlaandse regering. Schoonwal Wilhelm femilie wes van Wilhelmina, is zee officieel nooit op Huis Doorn ewes. Het Riek hoofden Wilhelm neet te oonderhoolden, want hee har geeld te ballast en hee kon ziene 50 personeelsleden makkelijk oet de eagen knippe betalen. Mr. Jan Kan gung namens een Minister van Binnenlandse Zaken heel vake noar Wilhelm II van Hohenzollern noar Huis Doorn. Kan was slim sportief, kon good voetballen en hockeyen en heul neet van oarge flantuten. Ne keer steun de verzamelde pers vuur het poortgebouw van Huis Doorn. Ze wollen mr. Kan een poar vroagen stellen oaver Wilhelm. Mear Kan köm mear neet en het doerden wal twee uur. Ene van dee perskearls vreug an een marechaussee of mr. Kan nog noar boeten hen zol kommen. Een marechaussee keek en betje gek en zea: “Maar meneer Kan is twee uur geleden al vertrokken. Hebt u die man op de fiets de poort niet uit zien fietsen?”
Mr. Jan Kan – joawal, de va van cabaretier Wim Kan – har zeelden nen hood op en vandoar dat hee duur de poorte van Huis Doorn kon jagen zoonder dat um de perskearls in de gaten hadden. Kan hef ook nog een zetje staatssecretaris ewes. Ook de staatssecretarissen hadden in dee tied nog een deftig ceremonieel uniform. Toch gong Kan op Prinsjesdag gewoon op de fietse noar de Ridderzale. Zienen sabel har’e an de stange van de fietse vast-ebeunden.
Zukke kearls wordt neet mear emaakt…
Gerrit Dannenberg
