As ik miene kammeröa heel klook oaver voetbal heur kuijern, dan wee’k miene plaatse. Zoonder kennis van zaakn, gewoon een kop dichte-hoolden. Aanders wordt ’t gelul in de ruumte.
Dat geeldt vuur alle dinge in oons leaven. Mear an alle talkshowtoafels zit rechtevort allene mear deskundigen. Verstaand van de hele wearelnd en doarumme ook deep verontwaardigd oaver alles.
Een wolf mu’j accepteren. Deskundigen veendt dat dissen grootn predator aander zeek weeld opruumt. Zeg dan neet dat den wolf ook gezoonde sköape lust, want dan zir iej het lellijke deer. Nen wolf is nen vleais-etter. Oaver meanselijke vleaisetters doot de weeldste verhalen de ronde. Oaver ambachtelijke slagers net zo. Ik zag lest een filmpje oaver nen slager in Nieuw-Zeelaand. Hee slachten de beeste boeten in de weaide. Tikt op YouTube in “New Zealand mobile butcher”. Dan zee-j nen vakman an ‘t woark. In 13 minuten hef de hele koo een jas oet.
Vroger wörden der ook völle beeste en bign eslacht biej de boeren an ’t hoes. De grote hakbiele is nou vervöngen door een elektrisch kettenzaagje, mear vuur de rest zut ‘r allemoal nog precies zo oet. Kiekt ’s good hoe den Nieuw-Zeeuwsen slager dat kromme vilmes anzet op het anzetstoal. Ne vloeiende beweaging; twee keer zachte strieken en dan is ’t mes wier hoarschoarp.
Het kabinet wil de regels roond het zelf slachten versoepeln. Doar schrif Carolina Trujillo nen bazelcolumn oaver in de NRC woermet zee zichzelf de genadeklap geef. Allemoal van-heuren-zeggengelul. Respectvol ummegoan met deers zol ginnen slager können, zo leutert zee in de roondte. “Alsof je een machteloze eervol kunt onthoofden.” Op disse mega-onzin mu’j eagenlijk heelmoals neet reageren, as ik miej mear neet zo groewelijk opweenden kan oaver kleenkkloare leugens. In een film “The gods must be crazy” oet 1980 schöt bosjesman Xi ne antilope met ne gifpiele. Het deer slöp heanig in en Xi bödt zinne excuses an en verteelt’e het deer dat’e ech neet aanders kon.
Ambachtelijke slagers hebt dezelfde leefde vuur deers. Al was het allene mear umdat hee der van leaven mut. Ik kan det weten, want ik heb met dee slagers woarkt. Joaren laank. Zelfs stress biej de deers wordt vuurkommen, umdat stresshormoon ’n smaak van ‘t vleais bedoarft.
En komt miej neet an met det gebazel dat de deers der earder warren as de leu. As dát de readen is, dan wil ik een onmiddellijk verbod op het hoolden van heunde en katten in de hoeskamers. Want as ergens deers never nooit heurt, dan is het in verwoarmde ruumtes.
Der is neet ene goo readen te neumen um deers met ne natuurlijke vacht in ne verwoarmde kamer te loaten. Wal ne slechte readen: oew eagen deer-onvreandelijke egoïstische plezeer. Da’n kö’j een rund, dat een good leaven hef ehad, nog better respectvol dood doon. Want zon rund smaakt lekker.
Trujillo weet verestig neet woer ze oaver kuijert. In dat geval mu’j oew plaatse weten. Aanders wordt ’t gelul in de ruumte.
Gerrit Dannenberg
