Tellefon is makkelijk. Toch is gewoon “in ’t weeld” met mekoar kuijern het allerbeste. Vuur nood is de tellefon heel good. Mear het blíf een hulpmiddel det ten koste geet van echte communicatie. Iej stoat op ofstaand van mekoar en doar kö’j al misbroek van maken. Zeg der ene an de tellefon: “A’j nöast miej steundn, dan ha’k oe an ’n bek ehöwn.” Fealijk is det al verkeerd gebroek van de tellefon.
Met gebroek van X, LinkedIn, FaceBook en zo zeent de verkeerd-gebroekmeugelijkheden allene mear grötter ewörden. Iej zit gewoon in ’t hoes en vanoet dee veailige umgewing kö’j de meest vreselijke dinge oawer alleman roondstreujen, umdat dee allemoal op groten ofstaand zit. Hele slechte communicatie den ’t fealijk een naam van communiceren neet mag hebben. Eagenlijk zo’j met ’n aln of munn sprekken um bevuurbeeld anonieme communicatie as “neet bestoand” te beschouwen.
E-mail is ook ne hele praktische manere van communiceren. Mear blif een hulpmiddel. Weant doar op verdach. Nen rotmail is zó versteurd, zoonder da’j de leu woe’j rot oawer doot zelf sprekt. Nóg ne gloepens verkeerde manere van e-mailgebroek is nen mail CC versteuren. Carbon copy, een kopie van oew boskop geet ook noar den-of-den. Ik har ooit van doon met een middenkaderlid dat standaard al ziene mails CC steurden noar zienen ofdelingschef. Ik heb um rechtstreeks evroagn woerumme hee dat dee. Hee zea: “Dan kan de baas zeen de-r-ik het neet vergetten zir.” Ik steun perplex…. Want eagenlijk lapten hee der miej juust biej! Ik zea: “De baas kan zeen hoo good iej oew woark doot én wat ik verkeerd doo.” Hee zeg: “Weant bliej da’k dee mails neet BCC noar de baas doon….” BCC…, zoonder da’j het an de mail köant zeen woer dee boskop óók nog hen geet. Ik kon zon voel idee neet begriepen. Vanzelf make viej allemoal fouten. Mear a’j ne mail CC steurt, geew iej aandere leu nog neet eens de kááns um eerst oew excuus an te beden. Ik kon um der neet van oavertugen dat dit neet deugden. Toen heb ik met um of-esprökken de’k de mails van um in ’t vervolg dreks vot zol gooien. En dat hulp.
CC- en BCC-mailen is misbroek maakn van ’n heel praktisch hulpmiddel. Wat is dat toch met oons leu de’w zó smearig met mekoar umme-goat? Oezelf zo breed maken da’j aandere leu oet beeld drukt. Gebuurden op ’t skoolplein vroger vuural duur jongs en meaks dee ’t stiekem noar de boawenmeaster hen gongen um der oe biej te lappen. Mieze möage, minne petriezen. A’j den ie-klaank laank maakt, kö’j ’t hoaste neet met een vreandelijk gezichte zeggen. (B)CC-communicatie is gin communicatie.
Gerrit Dannenberg
