Denne wat de piel-en-boage oetevunden hef mag wal ne medallie (al wör den pas völle eeuwen later oetevunden). Et skealden nen helen hoop as iej neet mear met nen langen spear hoovden te smieten, mer gewoon van ofstand een skoarp stökken in een töwken konnen leggen, anspannen, good mikken en dan et bloodspoer volgen.
Iej en ikke warren der misskien wal geheels neet ewest as der gin piel-en-boage had ewest. Dat gavven de duurslag of onze vuurolden geregeld vleis te etten hadden of neet. Anders ha’w allemoal nog grotendeels vegetarisch ewest, mu’j noagoan! To-egeven, tegelieke konnen heel wat vuurolden et neet noavertellen duur dee oetvinding, mer dat was mear een biekomstig gevolg van kreatief umgoan met de kwaliteiten van et woarktuug…
Rechtevoord doot ze et enkel nog vuur de sport (behalve de Amerikanen). Dat is nog es ontspoerd, dat boagsketen. A’j zeet wat vuur stellazies as ze der umhen hebt hangen, der kump wal een half steiger met. Et ducht mie mear gewichtheffen as richten. Ik verwochte dat oaver ’n poar joar boagskutters gewoon met ne koare een wedstriedveld komt opjagen, de kleppe lösklappet en lekker an ’t skap in de kantine goat zitten. De stellazie sköt volautomatisch dree pielen of. Kloar. Dan hoovt ze helemoal noargens mear achteran. Klinkt al met al nog neet zo gek. Dan wördt et trouwens mear nen sport van wee as et beste achterears kan inparkeren met nen anhanger.
Mer as zwemmers een aquadynamisch päkken magt en fietsers ne karbonfietse en dröppelhelm, magt boagsketers nen stabilisator an de boage. En nog ene. Sketen met zijwieltjes. Iej zollen können zeggen dat boagskutten nen luien sport is. Een betten zo as darten, mer dan vuur leu met compensatiedrang.
Ik wol dus al vuurstellen um der ne oard biathlon van te maken: langlaufen en dan tuskenduur boagsketen. Da’j doar eerst op ski’s goat wosseln duur de weuste en dan hechebalgend en kold een doelwit mut zeen te sketen. In Nederland zol dat lastig wean, mer maakt der dan nen hardloopwedstried van. Dus ikke an et googlen an. Bleek dat ik al vuur a’k et zelf wusse nen niejen sport heb oet edacht!
In Nederland mut dat dan ‘Run Archery’ heten, want et is pas echt top as et nen Engelsen naam hef (zelfs as de sport oet Oost-Duutsland kump). Dan kö’w nog wat van de Duutsers learen. Dee neumt et gewoon Bogenlaufen. Boagenlopen. Doar kö’w wat met, mer ‘run archery’, nee, doar loop ik met ne wiede boage umhen.
Hardlopen he’k weinig met, umda’j in et wilde vort met de tonge op et doarde kneupsgat nen eande van oe of pladdeket langs dee rechte weagen van Nederland. Boagsketen is oersaai um noar te kieken; leu dee as stilstoand ne handevol pielen ofskeett. Doo’j dee beide te hope, dan he’j nen mooien kombisport woer’j de butte nog es lös van kriegt. Dat is nog es wat vuur op de Olympische Spöllen.
Martin ter Denge
