Stoatistiek is gin gemmestiek. Wal vuur de harsenen trouwens. In gedachten (en noe op papier) maak ik de meuiste salto’s. Mu’j mie in et echt neet vroagen, iej lacht oe van de bene.
Een zonnen gedachtenspronk woer’j oe de sprekwoordelikke butte an köant brekken is de theorie van Ludwig Bolzmann. Hee meanen dat een eslötten stelsel altied noar wandorde neigt. Doarbinnen is et een ophoes van wemmelige deelkes dee’t voordan tegen mekoar an köant plearen. Da’s de tweede wet van thermodynamiek. Da’j et eaven weett.
Bolzmann was nen mooien kearl. Den goocheln et allemoal zo oet dat in een heelal wat onendig is en de tied ook, et mer zo kan geburen dat der op nen mooien dag wat van dee deelkes tovallig heel kort zodöanig in mekoar griept dat der een netwoark van neuronen ontsteet.
Een brein.
Oew brein.
As de tied onendig is of in ieder geval heel lange, kan et stoatistisch bekekken mer zo geburen dat dat brein tovallig net meant dat he dissen kolumn zit te leazen.
Dus as de tied onendig is (en doar hef et alle skien van) is et heel good meugelik dat iej, met al oewe heugenissen an de gode olde tied van vroger, geveulens vuur Truusje den eagenlik verkering har met Henk of dat ene moal da’j oew glas met pikkerig zeuten Fristi ummestotten en oew moor met oew bekkern deed, allemoal tovallig ontsteet in de tiedsspanne van ne sekonde. Mear nit.
Stöarker vertellen: as de tied en et heelal onendig zint, is de kans stoatistisch bekekken grötter dat wiej allemoal mer zonnen harsenflits zint as dat wiej en de wearld um ons hen echt bestoat.
Dan is der ook nen kans dat der oargens ne versie van mie is den as wal sportief is en de eerste pries wint bie dressuurwedstrieden of härder kan lopen as Max Verstappen fietsen (ik neume mer wat). Feitelik ne mooie gedachte: Der is oargens een brein wat gin oorleuge kent, wat in ziene gedachten al 200 joar besteet en nog good te passe is en nog good kan, wat iederene in ziene fantaseerde wearld gewoon kan helpen as et neudig was.
Dus a’j et mer lange genog ofwochtet, is der vanzelf nen kans dat et allemoal terechte kump.
Net as dat ik ooit nog es met nen mooien kolumn kan kommen.
Martin ter Denge
