Daan Bonenkamp wordt per 1 januoari volgend joar een niejen hoofdredacteur van TC Tubantia. Hee volgt Martha Riemersma op, den vanof 2014 hoofdredacteur was van de grötste kraante van Twente. Riemersma koomp oet Freeslaand en hef hier in heur Twentse joaren weanig anstoot egeven. As Tubantialeazers goa’w oons dizze mevrouw oet Veenwouden vuural herinnern as ’n fotogeniek persoon van het auteursportret biej de weanig controversiële stuks dee ze of en too schreef in de kraante. Volgens zichzelf hef ze nen hoop edoan um de kraante te loaten oaverleaven in de digitale veeldslagen dee het medium mos leaveren. As leazer van de papieren kraante vernem iej doar natuurlijk niks van.
Bonenkamp is hoofd communicatie biej de Tweede Kamerfractie van D66 in ’n Haag. Hee hef oer-Twentse wortels, want Herman Haverkate senior was zien groffa en Herman Haverkate junior, den nog altied biej de kraante woarkt, is zien eum. Bonenkamp hef de Twentse manere van communiceren dus neet van nen vrömden. In Twente hebbe wiej jums de neiging bepoalde negatieve eigenschappen ’n betjen tactisch te verwoorden. Mien vaa zea ooit van een familielid ‘dat’e an ’n draank was’. Mear mien moo mocht dat familielid geane lieden en spreuk dat tegen met de woorden: ‘Jan is neet an ’n draank, mear hee lust gewoon verrek geane nen borrel.’
Ik mozze doar an deanken toen bekeand wörden maakt dat Bonenkamp hoofdredacteur van Tubantia geet worden. Bonenkamp was jums de persoon van de borrelroddel roond informateur Remkes. Vanweage te völle borrels zol Remkes nogal in de wärre wean ewes biej de informatiebesprekingen. Terwiel Remkes vaste neet mear as twee borrels har ehad: twee gleaskes oaln jenewer vuur en oonder ’t diner. De NRC dachen dät het bedoeling zol wean ewes um Johan Remkes te beschadigen. Mear nou ik weet van de Twentse roots van Bonenkamp goa ik doar toch een betjen an twiefeln. At Bonenkamp – met Twents geveul vuur verhooldingen – een borrelroddel in de weareld hef ehulpen, dan bedoelden hee vermoedelijk hetzelfde as mien moo: ‘Remkes is neet an ’n draank, mear hee lust gewoon verrek geane nen borrel.’
Gerrit Dannenberg
