Heanig beginnen, dat is et beste. In 2006 maken ik miene eerste vuurzichtige pennemeters rond de dinge dee’k kennen. De wonstea, de egene leefhebberiejen, muziek. Neet te lange, neet te oetgebreid, anders vergaloppeer iej oe. Gewoon es kieken wa’j köant. Zo begun miene nooit-opholdende Wikipedia-marathon.
Zeutjes an kree’k der mear techniek en skik van. Proberen ik es andere skriefskone. Mu’j es heuren wat een kommentaar a’j doar op kregen. Of iej heuren es bie andere leupers wo as zee et anvatt. Tien man en nen peardekop, mear wat köant dee et angoan. Niks op oetdoon, gewoon voordan. Inmiddels de 1000 artikelen vuurbie.
Ook mooi: Offroad. Van ’n pad of, de weuste duur. To boldly go where no Saksenman has ever gone before. Oaver wat dinge van noe hef nog nums ooit in et Nedersaksisch eskreven. Woerumme zollen ze ook, de wearld hef genog an lollige goodmodige verhaalkes oaver vroger. As der niks te lachen valt, hooft et allemoal neet. Dan mer ne clownssproake, hahaha.
Artificial intelligence, ik neume mer wat. Wat is dat in et Plat? De slappe hap zol doar ‘Keunstmoatige intelligeansie’ van maken, want wiej nemt plat wal serieus, mer dörft toch neet te völle ons egene plan te trekken. Stelt oe vuur da’j geteling dörft te zeggen in stea van ‘merel’, of sproake in de stea van taal. Völs te authentiek, plaatsvervangende schaamte vuur zovölle eulderwetsigheid.
Dee’w niks op oet. Kunstklookte he’w der van emaakt. Zegnt et gewoon een poar moal achter mekoar. Noa tien keer wee’j neet mear anders en denk iej: ja woerumme ook neet? En Reptielen? He’w doar gin better woord vuur? Joawal, wiej haalt gewoon de ‘kroepdeers’ wier terugge van de Noren. Hadden ze een poar honderd joar wierumme nog van ons eleend en nooit wierumme bracht. Da’s nog es de möaite.
Mer nog et aldermeuiste an dee skrieverieje is da’j et gewoon zo lekker nuchter magnt maken. Nemt noe dit Nederlands:
“Paracetamol is een veelgebruikt pijnstillend en koortsverlagend middel. In combinatie met andere geneesmiddelen wordt paracetamol tegen symptomen van verkoudheid ingezet. Het wordt meestal oraal of rectaal toegediend, maar paracetamol kan ook via de ader worden geïnjecteerd. De effecten duren tussen twee en vier uur.”
A’j dat rechtstreeks versakst krie’j dit:
“Paracetamol is een völlebroekt pienstillend en koortsverlegend middel. In kombinatie met andere geneasmiddelen wördt paracetamol tegen symptomen van verkoldheid inzat. Et wördt meesttieds oraal of rektaal todeend, mer paracetamol kan ook in ne oare injekteerd worden. De effekten doert tusken twee en veer uur.”
Mer et is toch völle meuier um der dit van te maken?
Paracetamol is een middel tegen zearte en koortsen. Tehope met andere geneasmiddelen gebroekt leu paracetamol ook as ze verkölden zint. Et kan slikt worden of in et gaetjen van et gat inbracht, mer ook in ne oare inspuitt. Et helpet oe tusken de twee en veer uur lange.
Martin ter Denge
