Iej weelt wa es hebben dat d’r op n’n verjoardag leu oe blieje maakt met ’n fleske goode wien, schier inpakt met ’n pampieren bleumke of wat dan ok d’r an vaste knupt. Mangs is ’t gin wien waor a’j van hoalt. Dat zet ie dan in de kaste en dat broek ie dan as d’r ’n moal wel achterhenkik dee d’r nich ofkerig van is.
Eenmoal, laank terugge, bin ik met zukswat oawer de schreve goan. Wiej mösen oonverdachts noar n’n verjoardag. D’r was gin tied um nog eargens wat te haaln. Too heurden ik oet de kökken: “D’r steet nog een strak inpakt fleske wien in de kaste. Zult wiej dat metnemmen?” Het was op dat momeant de ennige oplössing mear achterof was ik d’r toch nich voldoan oawer. Ik heb ‘t ok nooit nich wier doan.
Veur de 35e moal wörd Ajax veurige wekke kampioen van oons laand biej ’t voetballen, wied veuraleer de kompetitie veurbiej is. Zee wörd doorveur in ’t zunneke zet duur de KNVB dee eur doarbiej n’n mooien kampioensschale oawerlangt. Doar heb ze d’r ok al 34 van en den niejen heurt doar biej te kommen stoan in de trofeeën kaste. Mear dat doot ze nich. Zee goat d’r 42.000 stukskes van maken en dee geawt ze an eure anhaank. Ik vroag miej of hoo groot dee schale is um doar zoovöl stukskes oet te halen. (Ik heb dee schale van FC Twente ’n moal in de haande had. A’j doar 42.000 stukskes van wilt maken dan he’j doar, zoowied ik dat kan bekieken, wisse Hans Kazan of Hans Klok biej neudig um dat vuur mekaar te kriegen!)
Mear ’t keump d’r dan wal op an dat ze ginnen 35e kampioensschale meer hebt. En dat is toch zeund en jammer.
Biej Heracles heb ze twee van dee kampioensschale, FC Twente hef d’r ene van. Dee zult zik nog wal völle moale bedeanken um dat ding in stukskes te houwen. Dee bedeankt vust wal wat aans um an eure anhaank te geaven.
’n Kado da’j hebt kregen deurgeven past zik eanliks nich.
Dat is geliek um wat ik met dat fleske wien heb doan.
Mear biej Ajax deank ze d’r heel aans oawer. Zee hebt al zovöl van dee schale, doar kan d’r best ene van vot. Zee hebt d’r ok nog 20 veur ’t winnen van de beker. En den beker döt eur nich zo völ meer. Dat zee tenmeesten ’n peuske terugge Peter R. de Vries (gloodvol bewoonderaar van Ajax) op tillevisie. Den beker is moar ’n vertreurstings ding, doar wörd ze biej Ajax nich koald of waarm van, zee hee (of zo wat). As dat zo is könt ze möggelik dee bekerschale almoal in stukskes houwen. Heb ze wat te streuien met Sunterklaos.
Noachrift: Ik heurn zojuust dat ze biej Ajax n’n schale ekstroa hebt tookregen umdat ‘t ’n ampart kampioenschap is. Doot mear doer ! Ik wet nich wat dat amparte d’r an is is mear ‘t maakt ’n kroam wat seempeler. Völlicht keunt dee aandere klups dee ok wal es kampioen bunt wörden, ok zonne schale ekstra d’r biej kriegen. Waant dee kampioenschappe van dee klubs, zekers as dat één of twee keer gebuurt, mag toch geröst ok gaans ampart wörden neumt, toch? Of ze dee schale dan ok in stukskes goat snieden bin ik nich zo zekers van. Dat gef alderbarstens völ pröttel.
Martin Peters
