Doo’j wat verkeerd, dan is ’t zeker gin schaande um det gewoon too te geven. Vroger dachen de leu nog wal ‘s da’j dan oew zwakke kaanten leuten zeen. Onzin: het is juust heel modig um te zeggen da’j dinge neet good hebt edoan.
Ook in gröttere verbaanden. Der is de oetdrukking: “Met de kennis van nu, zouden we dat heel anders doen.” En det geeldt eagenlijk vuur alle dinge. Het mensdom hef nou eenmoal in ’t gebleudte um duur skade en skaande wies te worden.
Achterof gezeen zegge viej gewoon hardop det ’t jammer is de’w een dodo hebt oet-eroeid. Snappe best det dee zeeleu indertied dee dikke veugel makkelijk konnen vangen. Ze skient nog neet eens heel lekker te wean. Mear ze hadden der een poar mutten loaten leaven. Geeldt vuur de bisons in Amerika ook. Der zeent hele grote fouten emaakt biej het kappen van beume in boargachtige strekken woerduur de groond votspeulden en het hele gebied fealijk waardeloos wörden. Slavenhaandel dee-r-e viej as Hollaanders ook an met, mer ik heb nog nooit enen geschiedenisleraar heurden zeggen: “Ja dat was zeer winstgevend. Jammer dat het niet meer bestaat.” Geeldt ook vuur oonze koloniën. A’w Suriname nóg hadden mutten regeren, ha’w det nou völle aanders edoan. Ook in Indië zeent dinge kats verkeerd egoan. A’j allene al det hele kleane beukske Oeroeg van Hella Haasse least, dan wee’j fealijk al genog. Mear ook doarvuur geeldt: tóen dache viej oawer nen heeln hoop dinge aanders as nou. Toch worre viej de leste tied dood-egooid met de roop um oaweral excuses vuur an te beden. Toogeven da’j dinge neet good hebt edoan, is gin schaande. Mear excuses anbeden vuur wat oonze vuuroolders lange eleden edoan hebt, helpt gin drol. Doar lig nen taak vuur het oonderwies. Volgens miej hebt dee de leste joaren op dizze oonderdeeln heel good woark edoan. Doar koomp natuurlijk ook dee vroage um excuses vandan.
Gerrit Dannenberg
