Een Deensen voetballer, Christian Eriksen, 29 joar, kreeg oonder de wedstried nen hartstilstaand. Duur dreks reanimeern is ‘t allemoal gelukkig good egoan, mer dán begeent dan wier de komkommertied–discussie oawer de vroage of sport eagenlijk wal zo gezoond is?
Netuurlijk zeent ‘r slim ongezoonde sporten woer nen hoop geweeld an te passe koomp: motorisch geweeld biej autoblubbering en lichamelijk geweeld biej kickboksen. Iej köant ‘r zelfs schade an de harsens biej oplopen. Der zeent nog wal völle mear gevoarlijke sporten. Keaihard wielrennen is ook nit gezoond. Nen hoop wielrenners kregen nit vuur niks al tamelijk vlot corona, want dee ofgetrainde lichamen zeent kats verzoerd en hadn nauwelijks weerstaand. Mer een rally Paries-Dakar is ook neet gezoond; in de bloodhette duur ’t zaand en greentweuste jakkern is vuur leu dee det nit eweand zeent absoluut nit gezoond. Iesbearen in ’n zweet jaagn op de noordpool en pinguïn-eaier zeuken op Antarctica; nooit an beginnen. Doar kö’j vuurboetn al geent fesoenlijk een neuze oetsnuten.
Mer in de groond geet ‘t aaltied um het risico wa’j loopt. Schoonwal risico en kaansen heel betrekkelijke begrippen zeent. Wus iej wal da’j in Eanter mear kaans loopt um een vliegtuig op ’n kop te kriegen as oonder ’n trein te kommen? Risico en kaans, doar hef det met te maken. Ne mooie voestregel is het gevoar nooit op te zeuken. A’j aaltied an de veailige kaante bliewt, kö’j röstig nen boarg beklimmen. Zelfs op de buurte stoan wochen op de Mount Everest is heelmoals verantwoord, a’j het gevoar mear neet oetdaagnt.
Foebaln is ook neet gezoond a’j aaltied kats oawer oew greanzen hen goat. Mer vake foebal kieken is ook heel ongezoond. De leu zakt dale in de baanke, nen grootn bak chips, keze, dreuge worst en beer vuur zich en dan mear zitn en allene of en too in de bene at ‘r ne goale wordt emaakt. Vuur de gezoondheaid zol ’t better wean dat ‘r allene oefenwedstrieden worden oet-ezeunden tusken Ajax en het achtste van Excelsior in Riessen, dát hooldt oe vlugge.
Verdan in beweaging bliewen is trouwens aaltied good. Mear ook dat nooit oawerdriewen. Oaweral woer “te” vuur steet is nit good. Behalve te-vrean en te-quila, zengt de leefhebbers van nen stewigen borrel dan. Nee, te völle is nooit good. Zelfs te völle kóffie kan heel gevoarlijk wean. Kortens is der in de hawen van Rotterdam nen kearl estörven an koffie. Hee kreeg ne bale van 500 kilo op ’n kop.
Gerrit Dannenberg
