Mark Rutte geet zinne Haagse zaken langs op ’n sportief Cogaatje. Piet Hein Donner jach op ne klassieke hearenfietse. Ooit dee Dries van Agt geane an wielrennen. Wim Kan, ene van oonze grötste conferenciers, kon Van Agt merakel imitieren. Op de vroage hoe Van Agt dachen oawer PvdA-leider Joop den Uyl, leut hee Van Agt zeggen: “Het is…het is in de politiek net als in de wielerspogt: Joop is een goeie tweede.”
Vanof dee tied komt er alverdan mear gezoonde, sportieve politici. Willem Vermeend dee alle dage nen pot snel-schaakn vuur hee op de fietse noar ’t ministerie stapten en Wopke Hoekstra dut an kickboksen. En ás belangrieke leu al ongezoonde dinge doot, dan blif dat angstvallig boeten ‘n kiekerd. Dat Beatrix rookten as ne stoompiepe wusse wiej allemoal, mear nums hef ’t meanske ooit zeen roken. Net zo min as ’n koning en de koneginne. Volksgezoondheaid is een belangriek dinge en belangrieke leu mutten het goo vuurbeeld geven.
Minister Dylan Yesilgöz-Zegerius wordt een liesttrekker van de VVD. Zee veendt de VVD de meest liberale partieje den ze zich kan vuurstellen. Normaal zo’j doar bliej van worden: persoonlijke vriejheaid, persoonlijk bezit, persoonlijke meaning, persoonlijk oew eagen beslissingen nemmen. Totdat ik vernöm dat dissen minister weanig belang hecht an oonze persoonlijke privacy. As de umstandigheden dat vroagt, wil ze onmiddellijk al oons berichtenverkeer inkieken. Woerumme? Dan kö’w criminelen earder in de kraag griepen. Doar is wat vuur te zeggen, mear wat doo’j dan met al dee berichten van alle leu dee niks verkeerds doot. Allichte da’j doarin dan ook dinge zeet dee wal ‘s bedreigend köant wean vuur de veailigheaid en de volksgezoondheaid. Woer is de greanze?
Der zeent leu dee heel luchtig doot oaver de privacy. “Ik heb niks te verboargen,” zegt ze dan. Mear hoe betrouwboar oonze oaverheaid is, he’w de leste joaren wal ezeen. Het lig der mear an wee der an het roer zit. Leu dee niks verboargt, hebt alns te vrezen. In Nederlaand is dat gelukkig neet altied dreks nen ramp. Mear een poar joar terugge wa’w in het vuurmalige Oost-Berlien. In de Stasi-gevangenis Hohenschönhausen krege wiej ne roondleiding duur nen gids den zelf in dee DDR-gevangenis har ezetn. Hee zea: “Kiekt oet vuur regeringen dee moatregeln nemt um de vealigheaid en de volkgezoondheid te beschoarmen, want zukke regeringen hebben wiej in de DDR 50 joar lang ehad.”
Gerrit Dannenberg
