Twee uur, tweeëntwentig minuten en enenvieftig sekonden har Nienke Brinkman neudig um ne strekke van 42 kilometer of te leggen. Dan loop iej ummerekkend al gauw zo’n zeuventeen kilometer an et uur. Da’s neet gewoon hardlopen, da’s vies hard lopen.
2.22.51. A’j neet better wusten, zint et mer cieferkes. Et zol hoaste nen doatum können wean. A’w tenminsten Amerikaanse notatie anholdt van moand dag joar. Of de moanden opknippet en der een poar bie verzint. Et zol in ieder geval mienen ankomstdoatum wean, as ik gisteren was vertrökken.
Mer et sleppen op La Gomera ligt mie nog iets te varsk in et (spier)geheugen. De bulten van Barranco de las Rosas beten mie beheurlik in de bene. Seed dee tied he’k der mie nog neet wier to können zetten. Doarumme is miene bewondering vuur dit nieje record eens zo groot.
Ook mooi at disse vrouwe van 28 dat geouwehoer in Rotterdam der zo mer een betten bie dut. In et dagelikse leaven is Brinkman “gewoon” geofysicus (al mean ik dat et as vrouwe toch -ca mos wean?) Anyway, loa’w et der op holden dat zee een good verstand hef van de earde. Eardgelearde, in et Twents ma’j der zo wat van maken.
Zee dut boademtrillingen op Mars onderzeuken. Gin idee wo a’j der komt, mer a’j zo hard loopt geleuf ik oe direkt. En a’j hard genog stampt onder et lopen, kan et mer zo wean dat de instrumenten der nog wat van oppikket ook nog.
Misskien helpet öar de eardkunde bie et lopen. Dan he’j misskien wat berekkeningen um op te kauwen onder et bosken. Behalve as ze natuurlik zo’n geofysisch keiken in ’n skoon krig. Dat kan mer zo, want um et nog gekker te maken dut zee ook nog trailrunnen. Sleppen oaver ’n pad. En dan neet zo mear van dee hollandse anehoarkte pädte, mer hoge in de boargen. Ik geleuve vaste dat zee zol lachen um Barranco de las Rosas.
Mer nog et allermeuiste vind ik dat zee pas twee joar hardlöp en dit pas dee tweede marathon woeras ze an metdut. Iej zollen hoaste zeggen: den hef wat in te halen. In ieder geval löt Brinkman wat zeen: dat a’j oargens mer wille an hebt, da’j dan vanzelf nen ende komt. (Tweeënveertig kilometer inderdaad ja).
Noe nog hoppen dat dat vuur mie ook geldt, vuur dee vief kilometer Riesserboargloop oaver dree moand. Van den Brinkman goa’w in ieder geval nog nen hoop heuren.
Martin ter Denge
