Sportleu spölt rechtevoort vake met passie. Op LinkedIn strukel iej oaver de oondernemmers dee met passie eur woark doot. Passie is ene van de meest mishaandelde woorden van dit momeant. Vake ook in enen oadem eneumd met emotie. Nen gepassioneerden voetballer dut zien kunstje met volle oavergave. Iej köant dan zelfs nen gepassioneerd grootn bek hebben teegn een scheidsrechter. Mer a’j dreks excuses anbeedt, veraandert passie neet in onbeschoft gedrag.
Passie is een woord dat snel verbleekt. Ten deeptse hef passie van doon met het lieden van Christus, mer a’j modewöarde vake genog gebroekt in nen aandern context, is ’n glaans der vlot of. Net as erotiek ook tot op ‘n droad versletten is tot porno. Zo geet dat ook met taal. Vuural met de Nederlaandse taal de’w in Tweante met groot recht Hollaands neumt.
Passie en erotiek bestoat neet as dialectwoard. Det is een vuurdeel, want dan hebt de wöarde gin last van slijtage. Der zeent in het plat aandere wöarde um gloodvolle gemoodstoostanden oet te drukken. Dinge dee’j met passie doot, kö’j vertalen met leefhebberieje. Dinge vuur-de-leefhebberieje-doon zeent de hobby’s en dinge mét leefhebberieje doon is gezoond noaberschap. Neet allemoal zo hevig as gepassioneerd, mer de betekenis blif onveraanderd. Dat hef ’t plat minstens 3 meter vuur op ’t Hollaands.
Ik zir nen groten leefhebber van de Nederlandse taal. Neet gepassioneerd, mer ik heb wal machtige bewoondering vuur grootheden as Vondel, Hooft, Mulisch en in zin soort ook drs. P Umdat ik met plat groot-ebrach zir, doo’k eagenlijk het leefste plat. Ik veende ’t ook mooi dat ’t plat op dissen sportsite de ruumte krig. 70 proceant van Tweante dut oaverdag gewoon plat. As het plat neet zol voldoon, deden ‘t de leu dat echt neet meer. Dat is ook het mooie van dialect as sprektaal: at het nergens mear vuur neudig is, gebroekt ’t de leu ’t gewoon neet mear. Heel bescheaiden en realistisch.
Mear vuurlopig hef ’t nog nut. Vuural vuur oale leu dee ’t er begeent duur te lopen. Doot doar vuural plat met, doar leaft ze van op. Doarumme mu’j de jongs en meaks in de zorg ook plat learen. Sprekken is neet verplicht, mear verstoan is al heel mooi. Dan zi-j al op de helfte a’j ’t weelt sprekken. Mear dat ma’j zelf beslissen.
Der zit ook weainig geater in ’t plat. Dubbele betekenissen he’j in ’t plat stukken meender as in ’t Hollaands. Dat vaalt oe op a’j woorden ene-op-ene goat oaverzetten. Passie kö’j in het Hollaands vertalen met hartstocht. Mer in ’t plat woarkt dat toch aanders. Hartstocht krie’j dan as de ene kleppe iets mear lös steet as ’n aander…
Gerrit Dannenberg
