Ik zin der oet! Et had de oplössing können wean vuur heel wat problemen. Et inzicht hef wal eaven edoerd. En et kump ook froai late. Mer better dat as nooit, ja.
Op Tenerife zitte wiej hier bie een stel heel vreandelike Duutsers. Helmut en Laura. Prachtig oetzicht oawer ‘n Atlantischen Oceaan bie El Sauzal en Los Ángeles, tusken pälme, pearske, oranje rode en gelle blomen en langs vulkanische rotsen. ‘n Auto good op de handremme, want ‘onze’ stroate löp 10% op. En of! Et is mer net van wat vuur ne kante o’j et bekiekt.
Een roem appartement he’w, ne grote tellevisie vuur leu dee et met mekoar neet gezellig köant hebben, een zwembad met badjassen der bie, ein Herzlich Willkommenpils im Kühlschrank, een kroeperig mer good oeteröst kökkentjen woer’j de eier ook wal goar kriegnt en ne katte den a’w neet binnen wilt hebben kssst vort iej!
Wiej zint wal regelmoatig in Duutsland ewest. En ook wal in Oostenriek en Zwitserland. Altied etzelfde. Allens degelik, keurig, netjes, skone. Gut gepflegt.
Mer woerumme oh woerumme hebt ze doar toch altied van dee akelige zachte kussens? Van dee pofzäkke dee heel groot liekt, mer dee Pffffff doot zo gauw a’j ze anraakt. Der klinkt nog net ginnen scheet. Et volgende ogenblik lig iej met ‘n kop strak an de matrasse. Mer wal met ne krone van kussen um oe hen efosked, behalve ónder oe woer’t he heurt! ‘n Anderen dag wordt iej gebrökken wakker, met zearte in spieren woervan a’j geheels neet wusten a’j ze hadden!
Mean iej da’j wied vort van dee ellende zint, kom iej der op Tenerife wier met in anraking! Toch ja gin wonder at al dee Duutsers aait zo knarrig en stief zint? Dee sloapt gewoon neet good. Dee loopt stöadig met nen stiewen nekken rond en ja, doar wor’j vervelend van. Wiej broekt nackenunterstützung!
Ik wil hier ginnen Godwin maken, mer ik denke at den wal good sleup. Mie ducht at der in ieder geval nen hoop ellende in de wearld vuurkommen kon worden as leu fatsoenlike kussens zolden hebben. Of naja, ik zol et wal prettig vinden.
Martin ter Denge
