Nöaln hef ’n voetbal as volkssport nummer 1 glaansriek verdrungen. Nöalden vroger allene de kearls van Vandaag Inside, op dit momeant nöalt iederene. Nöaln is mooi Twents vuur zeeldzaam drammen en dat alleman dut ‘t.
Der wordt nöald oaver Groningen umdat verzakte leu te late herstelgeeld kriegt. Nöalen oaver de huze langs ’t kanaal in Vroomshoop, ook oaver huze dee doar gewoon verzakt van oolderdom. Nöalen oaver boeren dee der oet mutten scheaiden, ook al warren ze dat al lange van plan. Nöalen oaver de regering, want den löt völs te völle boetenlaanders binnen en an al dat genöal te heuren doot ze dat bliekboar expres!! Vuural um de Hollaanders dwars te zitten. Nöalen oaver ’t oonderwies, want doar vret ze allene mear oet ‘n neuze. Nöalen oaver de gemeente, oaver de huzenprieze, want dee zeent völs te hoge. Oaver de inflatie, want den löp gierend oet de haande. Nöalen oaver de hoge reante. Oaver Tata-steel, een gemeenteroad, de polletiek, het grote geeld, de baanken, de verzekeringen, de interim-managers en de oondernemmers van de graai-flatie. En ze mutten aaltied precies miej hebben. Op alle nöalforums doot net of Mark Rutte juust óé mut hebben, oe persoonlijk wil raken, juust oew boerenbedrief noar de verrekkenis wil helpen en precies oew hoes en oewne oondernemming kapot wil maken.
De’w met ’n aln het stikstofprobleem maakt duur goodkoop etten te kopen, allene Tuurlijk-wel-Aldi-priezen weelt betalen en het lekkere van Albert Heijn vuural de keupkes zeent. Al dee dinge kieke wiej vlot oaver ’n kop. Á’w mear wat te nöalen hebt. En wiej hebt ook zo völle meugelijkheden um de nöalderieje wieter vot te zetten. Op Facebook, TikTok, LinkedIn en Insta….wiej nöalt ‘r vrolijk op lös. En a’w mekoar verdan geliek geeft, wordt de nöalderieje alverdan heviger. Medestaanders wordt mede-nöalers en wiej hooldt mekoar mooi gangs met nöalen.
Mear toch….opvallende völle leu dee fealijk niks te nöalen hebt, nöalt as ’t zo wisket. Mer de medische zorg is noa corona wier volop gangs, ’n apotheek dut oe de goo medicienen, de dokters heurt oew genöal gedeuldig an net als de psychiaters a’j wordt duurverwezen. Der geet nog gin meanske dood van ’n honger, de meeste leu hebt woark en inkommen en het is gloepens mooi wear.
Miskien nöalt leu gewoon geane. As ze ‘t neet zo geane zollen doon, zollen ze ’t wal loaten. Nöalt neet!
Gerrit Dannenberg
